Шығыс Қазақстан облысының әкімі Даниал Ахметов әлеуметтік маңызы бар тауарлардың бағасын негізсіз өсірген кәсіпкерлердің жазаланатынын айтты.
Әлеуметтік маңызы бар азық-түлік тауарларының бағасын тұрақтандыру облыстың жергілікті атқарушы органдары қызметінің негізгі бағыттарының бірі болып табылады. Өңіріміздегі азық-түлік бағасын тұрақты ұстап тұру үшін бірқатар шаралар жүзеге асырылып жатқаны белгілі. Аталмыш бағыттағы жұмыстардың барлығы облыс әкімінің назарында тұр.
Бүгінде тұрақтандыру қоры павильондарына тауарлар көптеп жеткізілуде. Бұл жайлы жуырда облыс әкімдігінде өткен жиын барысында мәлім болды.
— Бүгінгі таңда елдің оңтүстік облыстарынан қырыққабат жеткізуге келісімшарттар жасалды. 200 тоннаның 75-і «Ертіс» ӘКК» АҚ-ның сауда павильондарына жеткізілген. Ал қант қоры 10 күн сайын толықтырылып отырады. Ұн жеткізу бойынша да арнайы жасалынған келісімдер бар. Алдағы уақытта үй маңындағы дүкендерді тексеруді жалғастыру қажет, — деді аймақ басшысы Даниал Ахметов.
Аймақтағы азық-түлік саудаымен айналысатын кәсіпкерлер арасында түсіндіру жұмыстары да жүргізілуде.
Жиында облыс әкімі әлеуметтік маңызы бар тауарлардың бағасын негізсіз өсірген, сөрелердегі азық-түліктің бағасын жазып көрсетпеген кәсіпкерлер жазаға тартылатындығын айтты.
Аталған жиында сонымен қатар өзге де маңызды мәселелер қаралды.
Азамат ЕРСАЙЫН,
«Семей таңы»
