Облыс әкімі Даниал Ахметов қалалар мен аудандар әкімдерімен кеңес өткізіп, «Ауыл — Ел бесігі» бағдарламасы аясындағы жобаларды іске асыру мәселесін талқылады.
Бағдарлама портфелінде 103 жоба бар, 45 жоба бойынша келісімшарттар жасалған, 58 жоба бойынша конкурстық рәсімдер аяқталуда.
Аймақ басшысы 10 маусымға дейін әрбір әкімге келісімшарт жасасу мерзімінің ұзаққа созылу себебін көрсетіп, толық ақпарат беруді тапсырды.
— Әрбір әкім келісімшарт жасасу мерзімінің неге ұзаққа созылатыны туралы толық ақпарат беруі тиіс және осы күнге дейін денсаулық сақтау және білім беру салалары бойынша барлық жобалар іске асыруға дайын болуы тиіс,- деп ескертті Даниал Ахметов.
Облыс әкімі сондай-ақ спорттық және әлеуметтік нысандарды тапсыруды жоспарланған мерзімінен кешіктіретін құрылыс компанияларымен жұмыс істеу маңызды екенін атап өтті.
— Мұндай мысалдар кейбір аудандарда бар және әкімдер мұның неліктен болып жатқанын түсінуі керек, егер дәлелді себептер болмаса, шартты бұзып, жобаларды аяқтау үшін адал мердігерлерді іздеу керек,- деді аймақ басшысы.
Даниал Ахметов сондай-ақ әлеуметтік маңыздағы азық-түлік тауарлары және денсаулық сақтау мен көлік салаларындағы қызметтер бағасының негізсіз көтерілуіне жол бермеу үшін мониторингтік топтарға өз жұмыстарын жалғастыруды міндеттеді.
Анар АХМЕТҚАЛИЕВА,
«Семей таңы»
