Семейде жылумен қамту нысандарын ағымдағы жөндеу жұмыстары 15 тамызға дейін аяқталады. Бұл туралы Семей қаласы әкімдігінде өткен отырыста айтылды.
Жиында жылу маусымына дайындық барысы туралы айтылды.
Қаланы 18 жылу көзі және ЖЭО-1 жылумен қамтамасыз етеді. 72 орталық жылу пункті, 68 қазандық агрегат бар. Жылу желілерінің ұзындығы 313,998 шақырымды құрайды. Өткен жылы 1 289,3 млн теңге қаржыға жылу қазандықтары жөндеуден өтті.
Алдағы жылыту маусымына дайындық жұмыстары 18 сәуірде басталды. Жылу желілеріне гидравликалық сынақтар жүргізілді. Жаңғырту және ағымдағы жөндеуге 3,469 млрд теңге бөлінген. Қазіргі күндері «Орталық» және «Ғаббасов» қазандықтарын жаңғырту жұмыстары жүргізілуде, 20 Гкал/сағ су жылыту қазандықтарын қоса орнатылатын болады. Осы жобаларды іске асыру жаңадан салынып жатқан нысандарды қосымша қосуға мүмкіндік береді. Сондай-ақ 14 жылумен жабдықтау нысандары — «Солнечная», «Квартал АБ», «35 квартал», РК-3, РК-2, «Орталық», «35 квартал», «Ғаббасов» қазандықтары, «5 интернат», «Привокзальная», «ВИРП» жылу көздері жөндеуден өтуде.
Сонымен қатар «Орталық» қазандығы мен «103-103А» қазандығы арасына қосқыш орнатылады, бұл өз кезегінде «Орталық», «Ғаббасов», «103-103А» жылу көздерін қосуға мүмкіндік беріп, жаз айларында осы қазандықтардан қуат алатын абоненттерді ыстық сумен қамтамасыз етеді. Сол сияқты жабдықтар мен жылу желілері жөнделетін болады.
Алдағы жылыту маусымына 384906,69 тонна отын, 1300 тонна мазут қажет.
«Өткен жылу маусымында жылу көздерінің тұрақты жұмысы кезінде жылу желілері 160 рет жарылып, істен шықты. Негізгі себеп – сорғы топтарының желі ұзындығына сәйкес келмеуі. Жылу желілеріндегі нормативтен тыс ысыраптар мен апаттылықты төмендету үшін алдағы жұмыстардың жоспары жасалды. Ұзындығы 7,1 км магистральдық және кварталішілік желілерді 2 құбырлы етіп ауыстыру қажет. Үлкен жылу шығынын жою керек», — деді Семей қаласының әкімі Бақытжан Байахметов.
Жиында айтылғандай, тұтынылған жылу энергиясы үшін берешек 1 237,30 млн теңгені құрайды. Заңды тұлғалар бойынша 98 абонентке 120 426 мың теңге сомаға сотқа дейінгі арыз берілді. Жылыту маусымы басталғаннан бері жеке тұлғалардың берешегі бойынша талаптарды ресімдеу жұмыстары жүргізілуде. Қала әкімі «Теплокоммуноэнерго» басшылығына дебиторлық берешегін өтеу мәселесін 1 шілдеге дейін жабуды тапсырды.
Қаланы сумен жабдықтау және су бұру жұмыстарын иелігінде 497,9 шақырым су құбыры желісі, 276,9 шақырым кәріз желісі, 54 күшейткіш станция, 23 кәріз сорғы станциясы бар «Семей Водоканал» кәсіпорны жүзеге асырады.
Кәсіпорын жоспар-кестеге сәйкес жылыту маусымына 62 731,908 мың теңге сомасына су құбыры және кәріз желілері мен құрылыстарын жөндеу жұмыстарын жүргізуге тиіс.
Қалада 1427 тұрғын үй бар. Бюджеттік ұйымдар мен халық үшін барлығы 273645 тонна көмір жеткізу қажет.
«15 тамызға дейінгі мерзімде ағымдағы жөндеу бойынша барлық жоспарланған жұмыстарды аяқтау қажет. 1 шілдеге дейін көмір қоры 50%-ға, ал 1 қазанға дейін 100%-ға қамтамасыз етілсін. 15 қыркүйекке дейін барлық нысандардың жылыту маусымына дайындығын қамтамасыз ету қажет. Білім беру, денсаулық сақтау және мәдениет нысандары бірінші тамызға дейін 100% көмірмен қамтамасыз етілуі тиіс», — деді қала әкімі.
Семей қаласы әкімінің баспасөз қызметі
