Шығыс Қазақстан облысы тұрғындары арасында коронавирустық инфекцияға қарсы вакцина-профилактикалық шаралар жалғасуда, соның арқасында аймағымызда соңғы уақытта КВИ жұқтырған аурулар тіркелген жоқ, эпидемиологиялық жағдай тұрақты.
Айта кетейік, облыста биылғы жылдың басынан бастап COVID-19-дың 9324 жағдайы анықталды (қаңтар – 6426, ақпан – 2713, наурыз – 156, сәуір – 27). 100 мың тұрғынға шаққанда аурушаңдық көрсеткіші 686,6 адамды құрап отыр.
Ал 1 мамырдан бастап бүгінгі күнге дейін коронавирустық инфекцияның тек 2 жағдайы анықталды.
КВИ-ге қарсы вакцинациялаудың бірінші және екінші компонентімен қамту 100 пайыз орындалды. 12-17 жас аралығындағы жасөспірімдер, жүкті әйелдер мен емізетін аналар арасында Pfizer вакцинасының 1-ші компонентімен 109 214 адам егілсе (91,5%), 2-ші компонентін 106 924 адам алған (89,6%).
Биылғы жылғы 30 мамырдағы мәліметтерге сәйкес, 685 013 (92,8%) адам коронавирусқа қарсы ревакцинациядан (үшінші бустерлік доза) өтті. Ревакцинация жүргізу коронавирустық инфекцияға қарсы иммунитеттің қалыптасуына әсер ететіні белгілі.
Облыс бойынша бүгінгі таңда QazVac, Sinopharm, Pfizer вакциналары жеткілікті.
23 мамыр күні Қазақстан Республикасының Бас мемлекеттік санитариялық дәрігерінің «Қазақстан Республикасында коронавирус инфекциясы жөніндегі санитариялық-эпидемияға қарсы және санитариялық профилактикалық іс-шараларды ұйымдастыру және өткізу туралы» Қазақстан Республикасының Бас мемлекеттік санитариялық дәрігерінің 2022 жылғы 13 қаңтардағы № 2 қаулысына өзгерістер енгізу туралы» №25 қаулысы шықты. Осы қаулыға сәйкес енгізілген өзгертулерлерге тоқтала кетейік.
Қазақстанның аумағында 3 және одан да көп ай тұратын шетел азаматтарын қоса алғанда, барлық адамдар КВИ-ге қарсы ревакцинацияға жатады. КВИ-ге қарсы ревакцинация КВИ-ге қарсы алдыңғы профилактикалық екпеден кейін 6 ай аралықпен КВИ-ге қарсы вакцинацияның толық курсы бұрын бірінші ревакцинацияны алған адамдарға жүргізіледі. КВИ-ді жұқтыру қаупі жоғары (басымдылығы бойынша) медицина қызметкерлері; медициналық-әлеуметтік мекемелердің контингенті мен персоналы; күш құрылымдарының қызметкерлері; педагогтер; пенитенциарлық (қылмыстық-атқару) жүйе мекемелерінің контингенті; 50 жастан асқан адамдар КВИ-ге қарсы қайта ревакцинациялауға жатады. Қаулы ағымдағы жылдың 25 мамырынан бастап күшіне енді.
29 мамырдағы жағдай бойынша, облыста барлығы 406 адам 4-ші ревакцинациядан өтті, жоспар бойынша 34 289 адам өтуі қажет.
Өркениетті елдер арасында қайта ревакцинациялау COVID-19 айналымындағы және оның жаңа штамдарымен күресудің тиімді шараларының бірі ретінде танылып отыр. Қазіргі уақытта КВИ-ға қарсы 4-ші ревакцинацияны Нидерланд, Германия, Австрия, Австралия, Греция, Израиль, Италия, АҚШ, Польша, Жапония, Ұлыбритания, Канада, Сауд Арабиясы, Бельгия, Венгрия, Малайзия, Испания, Сингапур, Португалия, Швеция, Оңтүстік Корея елдері жүргізуде.
ШҚО Санитариялық-эпидемиологиялық бақылау департаменті COVID-19-ға қарсы вакциналау жұмыстары жалғасып жатқанын еске салып, облыс тұрғындарын екпе алуға шақырады.
Динара НҰРЛЫБЕКҚЫЗЫ,
«Семей таңы»
