Аймақ басшысы Даниал Ахметов Серебрянск бейорганикалық өндіріс зауытын қайта қалпына келтіру мәселесі бойынша кезекті кеңес өткізді.
Облыс басшысының айтуынша, жақын арада зауыт шатырын жөндеу жұмыстары басталады. Қазірдің өзінде кәсіпорынның серіктесі болуға және өнімдерін сатып алуға дайын кәсіпорындар бар.
«Бұл — жақсы бастама. Мен шығарылатын өнімдер нарығы мен құнын зерделеуді тапсырдым. Біз бағаны көтермеуіміз керек, өйткені осы нарықта лайықты орын алу маңызды. Сонымен қатар өз қаражатын жаңа станоктарға жұмсауға дайын инвесторлар да бар, бұл қосымша 150 жұмыс орнын береді. Мен әлеуетті инвесторлармен кездесуге және олардың ұсыныстарын қарауға дайынмын»,- деді Даниал Ахметов.
Аймақ басшысының айтуынша, әрбір 10 күн сайын өндірісті қалпына келтіру және оған бұрынғы даңқын қайтару мақсатында жаңа нақты міндеттер қойылады.
«Біз өз тарапымыздан кепілдік бере аламыз, бірақ инвесторлар зауытты одан әрі дамытудың егжей-тегжейлі жоспарын ұсынған жағдайда ғана»,- деп атап өтті облыс басшысы.
Естеріңізге сала кетейік, бұған дейінгі өткізілген кеңесте ұзақ уақыт бойы қиын қаржылық жағдайға тап болған Серебрянск бейорганикалық өндіріс зауытының қызметін қалпына келтіру үшін жұмсақ шатырды жөндеу қажет екені, оған облыстық бюджеттен ақша бөлу жоспарланып отырғаны айтылған болатын. Зауыт бұйымдарын жеткізуге 25 кәсіпорынмен шарттар жасалған, өнімнің жеті түрі облысымыздағы ірі өндірістік компаниялардың талаптарына сәйкес келеді.
Динара НҰРЛЫБЕКҚЫЗЫ,
«Семей таңы»
