Облыс басшысы Даниал Ахметов 2022-2023 жылдардағы жылыту маусымында көмірмен қамтамасыз ету мәселесі бойынша қалалар мен аудандардың әкімдерімен кеңес өткізді.
Амақ басшысының айтуынша, қазір көмір жеткізу кестесі «ҚТЖ «ҰК»АҚ-мен келісілуде.
«Қазір Өскеменнің әрбір көмір қоймасында бес мың тонна қор бар. Күзгі дүрлігудің алдын алу үшін әлеуметтік нысандар (білім беру, денсаулық сақтау, мәдениет, спорт және т.б.), сондай-ақ шағын қазандықтар көмірді қазірден бастап сатып алуы тиіс»,- деп жазды облыс әкімі инстаграм әлеуметтік желісіндегі жеке парақшасында.
Даниал Ахметов әрбір әкімге өз қаласындағы немесе ауданындағы көмір тұйықтарының жұмысын және жай-күйін тексеріп, уақтылы және үздіксіз көмірмен қамтамасыз етуін бақылауға алуды тапсырды.
«Көмірді темір жол арқылы жеткізу әлдеқайда арзан. Бұл қатты отынның өзіндік құнын төмендетеді және алыпсатарларға жол бермейді»,- деп атап өтті облыс басшысы.
Даниал Ахметов әр 10 күн сайын әкімдер осы мәселе бойынша есеп беретінін айтып, тамызға қарай барлық әлеуметтік нысандарды көмірмен толық қамтамасыз етуді міндеттеді.
Анар АХМЕТҚАЛИЕВА,
«Семей таңы»
