1 маусым – Халықаралық балаларды қорғау күніне орай Шығыс Қазақстан облысының дарынды оқушыларының форумы өтті.
Шығыс Қазақстан облысы білім басқармасының дарындылық пен қосымша білім беруді дамытудың Шығыс Қазақстан ғылыми- әдістемелік «Дарын» орталығы ұйымдастырған форумда 2021-2022 оқу жылы қорытындыланып, жалпы білім беретін пәндер бойынша оқушылардың республикалық олимпиадасының жеңімпаздары мен жүлдегерлері, дарынды оқушыларды марапатталды. Форумға республикалық, халықаралық зияткерлік олимпиадалар мен ғылыми жарыстардың жеңімпаздары мен жүлдегерлері шақырылды. Шара барысында Шығыс Қазақстан облысы білім басқармасының басшысы Сайрангүл Жұмаділова қатысушыларды Халықаралық балаларды қорғау күнімен құттықтады. Өз сөзінде ол дарынды жастар кез келген мемлекеттің мақтанышы және болашақ олардың білімі мен жаңа идеяларына байланысты екенін, ал балалардың жетістіктері облыстың имиджі мен беделін қалыптастыратынын атап өтті.
Бұл күні зияткерлік олимпиадаларда, спортта, шығармашылықта ерекше жетістіктер көрсеткен үздік оқушыларға облыс әкімінің атынан алғыс хаттар мен естелік сыйлықтар табыс етілді.
Облысымыздың зияткерлік құрама командасы биыл жалпы білім беретін пәндер бойынша оқушылардың республикалық олимпиадасында 30 медальды жеңіп алыпты, оның ішінде 8 алтын медаль бар. Форум аясында республикалық олимпиаданың жеңімпаздары мен жүлдегерлеріне Қазақстан Республикасы Білім және ғылым министрлігінің медальдары мен дипломдары, грамоталар мен ақшалай сертификаттар табысталды.
Шараға қатысқан оқушылар өз әсерлерімен бөлісіп, сапалы білім алып, жан—жақты дамулары үшін мемлекет тарапынан жасалып жатқан жағдайлар үшін алғыстарын білдірді және өздеріне артылған үмітті ақтау үшін күш-жігерлерін терең білім алуға, биік белестерді бағындыруға жұмсайтындарын жеткізді.
Өз тілшіміз
