Мемлекет басшысы Қасым-Жомарт Тоқаев «Қазақстан Республикасының әкімшілік-аумақтық құрылысының кейбір мәселелері туралы» Жарлыққа 4 мамыр күні қол қойған болатын.
Кеше, яғни 8 маусым күні жаңа үш облысты құру туралы Президент Жарлығы күшіне енді.
Сонымен, Қазақстанда 17 облыс пен республикалық маңыздағы 3 қала болады.
Шығыс Қазақстан облысының Семей аймағында Абай облысы, Қарағанды облысының Жезқазған өңірінде Ұлытау, Алматы облысы аумағында Жетісу облысы құрылды. Бұл облыстар тарихымызда бұрын да болған.
Ұлытау облысына Жезқазған, Қаражал, Сәтбаев қалалары, Жаңаарқа мен Ұлытау аудандары кірді. Облыс орталығы Жезқазған қаласы болды.
Ал Жетісу облысына Ақсу, Алакөл, Ескелді, Қаратал, Кербұлақ, Көксу, Панфилов, Сарқан аудандары және Талдықорған мен Текелі қалалары кірді. Облыс орталығы Талдықорған қаласы болды.
Абай облысына Абай, Аягөз, Ақсуат, Бесқарағай, Бородулиха, Жарма, Көкпекті, Үржар аудандары және Семей, Курчатов қалалары кірді. Облыс орталығы Семей қаласы болды.
Шығыс Қазақстанда облыс қана емес, екі аудан да бөлінді. Көкпекті, Тарбағатай аудандары 1997 жылға дейінгі қалпына қайта келтіріліп, екіге бөлінді.
Абай облысының аумағы 185,5 мың шаршы метрді құрайды. Жаңа облыстағы халық саны 638,3 мың. Шығыс Қазақстан жұртшылығының 47 пайызы жаңа аймақтың тұрғындарына айналып отыр.
