Шығыс Қазақстан облысындағы Ақбауыр, Шілікті алқаптарында және Елеке сазы жазығындағы қорғандарда археологиялық қазба жұмыстары биыл да жалғасатын болады. Бұл туралы облыс басшысы өзінің инстаграм әлеуметтік желісіндегі жеке парақшасында жазды.
Шығыс Қазақстан облысының әкімі Даниал Ахметов еліміздің танымал археолог ғалымдары Зейнолла Самашев пен Әбдеш Төлеубаевпен кездесті. Еске сала кетсек, екі ғалымның басшылығымен бірнеше жыл бұрын басталған бірқатар археологиялық жобаларды іске асыру жалғасуда. Кездесу барысында ғалымдар өз жұмыстарының қорытындылары туралы айтып берді. Зейнолла Самашұлы өзінің «ШҚО археологиясы туралы очерктер» атты кітабының сигналдық нұсқасын ұсынды.
Айта кетейік, ғылым докторлары, профессорлар мен ғалымдардың атсалысуымен «Қазақстан тарихы» үш томдық жинағы дайындалып жатыр. Жергілікті ғалымдар Ресей, Өзбекстан және Түркия мұрағаттарында болып, орасан зор жұмыс жүргізген. Қазіргі күнге дейін 15 мың түпнұсқа ақпарат жиналған. Бұл монументалды еңбек жыл соңында үш тілде жарық көреді.
Облыс басшысының айтуынша, Ақбауырда, Шілікті алқабында және Елеке сазы қорғандарында археологиялық қазба жұмыстары биыл да жалғасатын болады.
«Айта кету керек, ғалымдар жауынгер музыкант жерленген қабірлердің бірін қайта жаңғыртқан, үш аспап сақталған, қазір біз оларды халық аспаптар оркестріне қосу үшін дәл осындай аспап жасағымыз келеді»,- деп жазды ШҚО әкімі Даниал Ахметов.
Археологиялық зерттеулерге жоғары оқу орындары да, атап айтқанда ШҚТУ студенттері де қатысады, олар қорғандарда геодезиялық жұмыстар жүргізеді.
Азамат ЕРСАЙЫН,
«Семей таңы»
