Бұл туралы ҚР Премьер-Министрінің орынбасары Ералы Тоғжанов айтты, деп хабарлайды inbusiness.kz.
«Біз келесі қауіптер туралы айтып отырмыз. Біріншісі – климаттың өзгеруі. Болжамдар бойынша 2035 жылға қарай жер бетіндегі ауа температурасының үздіксіз жоғарылауы күтілуде. Екінші қауіп – трансшекаралық ағындар көлемінің қысқаруы. Бұл Қазақстанның экономикасының дамуына және экожүйесінің жағдайына кері әсер етеді. Үшіншіден, су ресурстарын дұрыс пайдаланбау», – деді Ералы Тоғжанов Мәжілісте өткен парламенттік тыңдауда.
Оның пікірінше, су тапшылығы климаттың өзгеруі, экономикалық белсенділіктің артуынан болуы мүмкін.
«Бұл тәуекелдерді азайтудың негізгі факторы – ресурстарды тиімді басқару, қолданыстағыларды жаңғырту және жаңа инфрақұрылымды дамыту, халықтың әл-ауқатын арттыру, жасыл технологияларды пайдалану және өндірістің қоршаған ортаға тигізетін әсерін азайту», – деп толықтырды Премьер-Министрдің орынбасары.
Ералы Тоғжановтың айтуынша, бүгінде ел тұрғындарының 96%-ы сумен қамтылған. Ауылдық елді мекендерде су құбыры желілерін салу және қайта жаңғырту жұмыстарын жалғастыру есебінен 2025 жылға қарай халықты 100% сумен қамту жоспарлануда.
Құралай Құдайберген
