Абай облысының әкімі Нұрлан Ұранхаев Семей қаласындағы Мелькомбинат көшесіндегі № 3, 4, 10, 11 үйлер тұрғындарының бастамашыл тобымен кездесті.
Тұрғындар облыс басшысынан жылу беру мәселесін шешіп беруді өтінді. Бұл үйлер ағаштан салынған, пеш жағатындықтан өрт шығуы қаупі бар.
— Үйлеріміз жылу беру жүйесіне қосылмаған. Алайда, бұрындары бізде орталықтандырылған жылу желісі де, ыстық су да болған. Ал, қазір пеш жағамыз. Тұрғындар арасында қарт адамдар көп, отынды жоғары қабаттарға көтеріп шығару қиындық тудырады. Үйлер ағаштан салынған, кез келген уақытта өрт болуы мүмкін. Жақында осындағы пәтерлердің бірінде өрт оқиғасы тіркелді, — дейді үй тұрғындары.
Облыс басшысы бұл мәселе бақылауға алынатынын және алдағы уақытта шешімін табатынын атап өтті.
— Бұл бағытта жұмыстар жүргізілуде, сметалық құжаттар дайын. Жағдай жақсарады деп сенемін. Біз бұл мәселелерді біртіндеп шешеміз. Жұмысты осы жылы бастауға және аяқтауға тырысамыз. Ең бастысы — жылыту мәселесін шешу керек, — деді өз сөзінде Нұрлан Ұранхаев.
Облыс басшысы жауапты органдар өкілдеріне аталмыш бағыттағы жұмыстардың орындалу барысын бақылауға алуды тапсырды. Ал тұрғындардан үйлерінің орталық жылу жүйесіне қосылуын күтуді сұрады. Дегенмен, пәтерлердегі пештерді бұзуға асықпаған жөн, себебі ұзақ жылдар бойы қордаланған осы мәселені шешуде біршама техникалық қиындықтар туындауы мүмкін.
Semeytany.kz
ABAI AIMAQ MEDIA
