AMANAT партиясының ШҚО филиалы жанындағы экономика, кәсіпкерлік және аграрлық сектор мәселелері бойынша өңірлік Қоғамдық кеңестің отырысы өтті.
Онлайн және офлайн форматта өткен кеңес отырысында «Бизнестің жол картасы – 2025» кәсіпкерлікті қолдаудың мемлекеттік бағдарламасы шеңберінде инфрақұрылымдық жобаларды іске асыру барысы қаралды.
AMANAT партиясы ШҚО филиалының «Өзгерістер жолы: әр азаматқа лайықты өмір» сайлауалды бағдарламасын орындауға арналған Жол картасының 24 – тармағы бойынша Бизнес объектілеріне инженерлік желілер жүргізу, жыл сайын кемінде 4 жобаны жүзеге асыру және Жол картаның 12-тармағы бойынша Үржар ауданында айналмалы суарудың жаңбырлатқыш жүйесін енгізе отырып, облыс бойынша егіс алқаптарын 6,8 мың гектарға дейін ұлғайту туралы мәселесі қаралды. Сонымен қатар кеңес мүшелері асыл тұқымды мал шаруашылығын субсидиялау бойынша жүргізілген жұмыстарға да тоқталды.
2022 жылы асыл тұқымды мал шаруашылығын дамытуды, мал шаруашылығының өнімділігін және өнім сапасын арттыруды субсидиялауға жергілікті бюджеттен 8,8 млрд теңге бөлінді. Бүгінгі күні 7,4 млрд теңге сомасына өтінімдер берілді, олар бойынша 2022 жылғы 1 маусымға 6,1 млрд теңге төленді. Ағымдағы айда, қаржыландыру жоспарына сәйкес, 500 млн теңге сомасында субсидиялар төлеу жоспарланған,- деді ШҚО Ауыл шаруашылығы басқармасы басшысының орынбасары Диляра Жылқайдарова.
Көп жылдық бақылаулар көрсеткендей, әр бес жыл ішінде облыста кем дегенде екі рет құрғақшылық байқалады. Сондықтан суармалы егіншілік, құрғақ далалы және шөлді — далалық егіншілік алқаптары басты назарда болуы тиіс. Шығыс Қазақстан облысында су ресурстарын тиімді пайдалану шеңберінде суарудың су үнемдеу технологиясы 15,2 мың гектар алқапта, оның ішінде жаңбырлату әдісімен 14,3 мың гектар және тамшылатып суару әдісімен 0,9 мың гектар жерде қолданылады.
— Жыл сайын қолданыстағы өзендердің жер үсті суларын пайдаланып, құрылыстар мен техникалық құрылғыларды қолдана отырып, су үнемдеу технологиясы бойынша суармалы алқаптар жоспарлы түрде ұлғайтылуда.
Үржар ауданында айналмалы суарудың жаңбырлатқыш жүйесін енгізумен облыста егіс алқаптарын 6,8 мың гектарға дейін ұлғайту мәселесі бойынша ағымдағы жылы жалпы құны 298,0 млн теңгеге 4 «RaineFine» маркалы айналмалы жаңбырлатқыш машина сатылып алынды,- деп атап өтті ауыл шаруашылығы басқармасының өкілі.
Жалпы, отырыс барысында көтерілген мәселелер бойынша кеңес мүшелері кейбір жұмыстың уақтылы жүргізілмеуіне байланысты басқарма басшылары мен өкілдеріне өз ұсыныстарын жеткізді.
— Қолға алынып жатқан жұмыстардың кемшіл тұстары жоқ емес. Осы анықталған олқылықты бірлесе отырып шешуіміз қажет. Себебі партияның сайлауалды бағдарламасында көрсетілген іс-шаралардың сапалы әрі уақтылы орындалуы маңызды,- деді Қоғамдық кеңестің төрағасы Зоя Новолодская.
«СТ» — ақпарат
