Семейдегі жедел медициналық жәрдем ауруханасында халықтың алғысына бөленіп жүрген өз ісінің шеберлері көп. Солардың бірі — жоғары категориялы дәрігер, медицина ғылымдарының кандидаты, аталған аурухананың хирургиялық қызмет жөніндегі басшысы, жалпы хирургия бөлімшесінің меңгерушісі Базар Масхұтұлы Төлеуов.
Базар Масхұтұлының есімі семейліктерге ғана емес, күллі шығысқазақстандықтарға жақсы таныс. Аталмыш ауруханада түрлі лауазымды қызметтер атқарып келе жатқан қолы шипалы дәрігер аймағымыздағы білікті хирургтердің бірі саналады. Бөлімшедегі ең күрделі, ең ауыр операциялар оның қатысуынсыз өтпейді десе де болады.
Хирург дәрігер болу үшін мықты ерік-жігер, терең білім қажет. Денсаулық сақтау саласының заңнама негіздері, анатомия, жансыздандыру қағидаттары, асептик және антисептик, рентгенология мен физиотерапияны меңгеруі шарт. Оған қоса заманауи тұрғыдан жаңарып жатқан хирургия саласында қолданылатын медициналық аппараттар мен құралдарды пайдалана алуы керек. Бұл ретте Базар Масхұтұлы — кейінгі буынға үлгі боларлық тұлға.
Хирург дәрігердің қызметі аурудың ауырлық дәрежесі мен сипатына қарай бөлінетіні белгілі. Сонымен қатар дәрігер маман көпшілік арасында, әсіресе қоғамдық орындарда орын алуы мүмкін кездейсоқ оқиғаларға да дайын жүруі керек. Білікті хирург мұндай оқиғаға да тап болған. Бұл орайда Базар Төлеуовтің осыдан біраз уақыт бұрын Бесқарағай ауданындағы Шошқалы көлінде шомылып жүріп, аяқ астынан судорогі ұстап қалған әйелді өлімнен құтқарып қалғанын айтпай кетуге болмас.
Науқасты ауруханаға жеткізгенше 150 шақырымдай жер бар еді. Базар Масхұтұлы еш кідірместен өлім аузында жатқан әйелге жасанды жолмен тыныс алдырып, ажалдан арашалап қалуға барын салады.
Дәрігерлің айтуынша, тұзды судан өкпе қатты ісіп кетеді екен. Соның салдарынан ауруханаға бара жатқанда әйелдің жүрегі екі рет тоқтаған. Хирург ауырған әйелге ауруханаға жеткенше жол бойы реанимациялық ем-шаралар жасайды. Осылайша, пациентті ауруханаға жеткізеді. Жол үстінде жағдайы ауыр науқас келе жатқанын, қандай даярлық жасау керектігін алдын ала реанимациялық бригадаға ескертіп үлгереді.
Ал науқас әйел ауруханаға жеткен бетте шұғыл түрде жасанды тыныс алдыру аппаратына қосылған. Дәрігерлер жұмыла кірісіп, оның өмірін сақтап қалды.
Мұндай ерлікке бару үшін, әлбетте, үлкен күш-жігер, қажыр-қайрат пен өз мамандығына деген адалдық, жоғары деңгейдегі кәсібилік керек екендігі анық. Ал мұндай қасиеттердің барлығы біздің кейіпкеріміздің бойынан табылады.
Халықтың ризашылығына, ықылас-ілтипатына бөленіп, алғысын арқалап жүрген Базар Масхұтұлын өз ісінің нағыз маманы, отандық денсаулық сақтау саласының маңдайалды қызметкері десек, еш қателеспейміз.
Әлібек КЕМЕЛХАН,
«Семей таңы»
