Ағымдағы жылы Абай облысына тұрғындарға медициналық көмек көрсетуге 63,2 млрд теңге қарастырылған, оның ішінде кепілді тегін медициналық көмекке – 35 млрд теңге, ал МӘМС – 28,2 млрд теңге бөлінді.
Бұл туралы Семей қаласының аймақтық коммуникациялар қызметінде өткен баспасөз конференциясында Әлеуметтік медициналық сақтандыру қоры ШҚО бойынша филиалының директоры Ғалымжан Әбілов тарқатып айтып берді.
Филиал директорының сөзіне сүйенсек, аталмыш қор тұрғындарға медициналық қызмет көрсету үшін 64 жеткізушімен арнайы келісімшарт жасаған.
— Жалпы, осы жылдың бес айының ішінде қаржыландыру 29,6 млрд теңгені құрады, оның ішінде кепілді медициналық көмек көрсету көлемі – 16,3 млрд теңге, МӘМС – 13,3 млрд теңге. Мақсатты топтағы науқастарды дәрі-дәрмекпен қамтамасыз етуге басты назар аударылады. Амбулторлы дәрі-дәрмекпен қамтамасыз етуге биылғы жылы 5,9 млрд теңге бөлінді, оның ішінде кепілді медициналық көмек көрсету көлемі – 5,6 млрд теңге, МӘМС – 0,3 млрд теңге. Дәрі-дәрмектің жетіспеушілігін болдырмау мақсатында, тиісті препараттарды алуға қаражатты Қор алдын ала төлем түрінде уақтылы жіберіп отырады, – деді Ғалымжан Әбілов.
Ғалымжан Әбіловтің айтуынша, Қор жеткізушілері халыққа КТМКК және МӘМС пакеттері шеңберінде көрсетілген медициналық көмек төлемін көрсетілген қызметтің сапасына және көлеміне мониторинг жүргізілгеннен кейін ғана жүзеге асырады. Яғни құжатпен расталған, медициналық көмек көрсету ережелері мен стандарттары сақталған, сондай-ақ клиникалық хаттама ұсыныстары бар нақтылы көрсетілген қызметтер төленеді. Есепті айдың қорытындысы бойынша, Қор филиалының сарапшылары 12,2 мың бұзушылықты анықтаған, айыппұлды есептегендегі қаржы 297 млн теңгені құрады.
Жеткізуші тарапынан бұзушылықтың алдын алу үшін Қормен проактивті мониторинг енгізілді, оның шеңберінде ақау анықталған жағдайда жеткізуші 45 күн ішінде кемшіліктерді жоюы тиіс. Әйтпесе оған айыппұл салынады. Бұл жаңашылдық медициналық қызметтің қолжетімділігін және сапасын арттырады және жеткізушімен арадағы қатынасты сенімді етеді, – деп түсіндірді Ғалымжан Әбілов.
Жыл басынан бері 2317 кемшілік анықталған, олардың 60,1 пайызына 45 күн ішінде кемшіліктерін жоймауларына байланысты айыппұл санкциясы қолданылған.
— Әлеуметтік медициналық сақтандыру қоры МӘМС жүйесінен тыс қалғандарды жүйеге қатысуға шақырады. Сақтандырылған азаматтар, төленетін жарналардың мөлшеріне қарамастан, МӘМС пакетіне, осы жүйе беретін артықшылықтарға қол жеткізе алады, — деп түйіндеді сөзін Ғалымжан Нұржаубайұлы.
Динара НҰРЛЫБЕКҚЫЗЫ,
«Семей таңы»
