Шығыс Қазақстан облысының сақшылары жағажайларды патрульдеуге атқа мініп шығады. ШҚО Төтенше жағдайлар департаменті баспасөз қызметінің мәліметіне сүйенсек, жаз шыққалы бері облыстағы өзен-көлдерде 6 адам, оның ішінде 1 бала суға кеткен.
Олардың барлығы да тыйым салынған жерлерде шомылған. Қайғылы оқиғалардың алдын алу үшін құтқарушылар атқа мініп, жағалайларды бақылауда. Бұл рұқсат етілмеген су қоймаларын жедел тексеру үшін ыңғайлы болып отыр.
ШҚО ТЖД бастығының орынбасары Арман Тоқановтың айтуынша, сақшылар жылқымен осындай рейдтерге былтырдан бері шыға бастапты. Адамдар демалуға жиі баратын оқшау жатқан учаскелерге көлікпен жету қиын болғандықтан, атпен жүріп демалушыларға қауіпсіздік шараларын түсіндіреді. Алдағы уақытта да осы сынды жаңа әдістер жұмысқа енгізілмек. Басты міндет — судағы қайғылы жағдайлардың алдын алуға тырысу.
Жұртшылыққа тыйым салынған жерлерде шомылудың қауіптілігі ескертіледі. Сонымен қатар полиция қызметкерлері тарапынан жағажайларда алкогольді ішімдік ішетіндер де жауапқа тартылып жатыр.
«Жылқы ыстыққа төзімді жануар. Бұл әдіс біздің жұмысымызды біршама жеңілдетті. Патрульдеу кезінде көбінесе суға шомылуға рұқсат етілмеген орындарға баратын тәртіп бұзушыларды анықтаймыз», — дейді Ұлан аудандық ТЖБ бастығы Әділ Бидахметов.
Тәртіп сақшылары жаздың ыстық маусымының басталуына байланысты қырағылықты осылай арттырмақ. Мұндай шаралар үзіліссіз жалғаса береді.
Әлібек КЕМЕЛХАН,
«Семей таңы»
