Абай облысының әкімі Нұрлан Ұранхаевтың шақыруымен Семей қаласына келген Қазақстан Республикасы Парламенті Мәжілісінің Экология мәселелері және табиғат пайдалану комитетінің төрағасы Александр Милютин, Экономикалық реформа және өңірлік даму комитетінің төрағасы Альберт Рау, Аграрлық мәселелер комитетінің төрағасы Ерлан Барлыбаев, министрліктер мен ведомстволардың өкілдері облыс әкімдігінде өткен кеңеске қатысып, Абай облысының даму болашағын бірлесе талқылады.
Аграрлық секторды дамыту — бүгінгі күннің өзекті мәселелерінің бірі. Жиында жергілікті шаруа қожалықтары мен ауыл шаруашылығы бөлімінің өкілдері ауыл шаруашылығын, жалпы, ауылдарды дамытудың маңыздылығына тоқталды. Кәсіпкерлер жергілікті өндірістік брендтерді қайта жандандыруға ниетті.
— Маңызды мәселелердің бірі қаланы жылумен қамту, сумен жабдықтау, су бұру және жолдарды жөндеу болып табылады. Энергетика министрлігі жанынан Семей қаласын жылумен қамтамасыз ету мәселелерін қарау жөніндегі жұмыс комиссиясы құрылды. Бұл комиссияның жұмысы жемісті болады деп үміттенеміз, — деді Бақытжан Байахметов кеңеске қатысушылардың алдында сөйлеген сөзінде.
Кеңесте энергетика вице-министрі Жандос Нұрмағанбетовке комиссия жұмысын жедел бастау туралы ұсыныс айтылды. Сондай-ақ ЖЭО-3 құрылысы жобасын қарау кезінде жылу көздерінде өндіретін электр энергиясын тасымалдау желілерін дамытудан, сондай-ақ Семей қаласында 220 кВ жаңа қосалқы станция салу мәселесінен бастау ұсынылды.
Кеңеске қатысушылар қолда бар және әзірленіп жатқан жобалар бойынша қаланы және елді мекендерді сумен жабдықтау, су бұру және қысқа мерзімді кезеңде сумен қамтамасыз ету жоспарын іске асыру мәселелерін қарады.
Сонымен қатар жол инфрақұрылымын, атап айтқанда Семей қаласының айналасында жаңа көпір мен айналма жол салу, мектептер мен балабақшалар және денсаулық сақтау объектілерін салу мәселелері қаралды.
— Қалада тұрғындарды жылумен қамтамасыз ету мәселелері бар екені белгілі. Тұрғындардан да осыған байланысты шағымдар өте көп келіп түседі. Жаңа ЖЭС салуға келсек, бюджеттен жылу электр станцияларын салу үшін 447 млрд теңге бөлінді, ал заңнама бойынша бұндай құрылысты тек инвесторлар жүргізеді. Яғни кез келген инвестор өзіне пайда әкелетін жұмыстармен айналысады. Сондықтан инвестицияны жүзеге асырушы тараппен бұл мәселені талқылап көруіміз керек, — деді Ұлттық экономика және энергетика вице-министрі Жандос Нұрмағанбетов.
Кеңесте сондай-ақ Семей қаласы мен ауылдық округтерді дамытуға бағытталған негізгі жобалар таныстырылды. Жалпы алғанда, 515 жоба бар, оның ішінде 177 жобаның құжаттамасы дайын, 97 жоба бойынша жобалық-сметалық құжат әзірленуде және 241 жобаның жобалық-сметалық құжаттамасын әзірлеу қажет. Бұл жобалардың барлығы қаланың негізгі мәселелерін шешуге бағытталған.
Мәселелер бойынша құрылымдық министрліктердің өкілдеріне тиісті түсініктемелер беріліп, Семей қаласы мен ауылдық округтерді дамытудың басым жобалары республикалық деңгейде қолдау табатынына сенім білдірілді.
Дана ТАЛҒАТБЕКОВА