Жаңа бағдарлама бойынша мектеп оқушылары қала сыртындағы және мектеп жанындағы лагерьлер, сондай-ақ аула клубтары негізінде қазақ, орыс және ағылшын тілдерін меңгеретін болады.
Бұл туралы аймақ басшысы Даниал Ахметов әлеуметтік желідегі парақшасында жазды.
Жаңа бағдарлама таяудағы екі жылға арналған, еркін атмосферада балалардың жасына сәйкес олардың сөйлеу дағдыларын дамытуға мүмкіндік береді.
— Бағдарламаны құруға тек тілтанушы педагогтер ғана емес, сонымен қатар психологтер мен тәрбиешілер, волонтер студенттер тартылады. Оқытудың әр түрлі формалары қарастырылған — бұл коммуникативтік ойындар, конкурстар, викториналар, шығармашылық шеберханалар, дебат клубтары және тағы басқалар. Осы жазғы маусымда Шығыс Қазақстанда 35 қала сыртындағы және 475 мектеп жанындағы лагерь, сондай-ақ балалардың жазғы демалысына арналған 485 өзге алаң (аула клубтары, үйірмелер мен секциялар) жұмыс істейтінін атап өткім келеді. Бағдарламаны іске асыру шілде айында басталады, ал келесі жылы ол лагерьдің барлық маусымында жұмыс істейтін болады, — деп жазды Шығыс Қазақстан облысының әкімі Даниал Ахметов.
Ерасыл КЕНЖЕБЕК