Өскемендегі Сол жағалау кешенінде Ұлттық домбыра күніне арналған мерекелік шара өтті, деп хабарлайды Altaynews тілшісі.
Бұл күні мерекені ұйымдастырушылар саябаққа келген қала тұрғындарын ұлттық киіммен қарсы алып, олардың назарына тамаша көрмелер мен концерттік бағдарлама ұсынды. Қалалықтар ұлттық аспаптар қалай дайындалатынын көріп, шеберлік сағаттарына қатысуға мүмкіндік алды.
Шараға арнайы қатысқан шаһар басшысы Жақсылық Омар мен облыс әкімінің орынбасары Азамат Мұхамедчинов алдымен киіз үйлердегі ұлттық бұйымдар көрмесін, этноауыл үлгісіндегі алаңда жас өнерпаздардың өнерін тамашалады. Сондай-ақ саябақтағы сахнада «Байжігіт» ұлттық аспаптар оркестрінің, «An Sal Dar», «Жігер», “Altay» ансамбльдерінің мерекелік концерті ұйымдастырылды.
Өскемен қаласы әкімі өнерпаздармен бірге күмбір күйден шашу шашты.
Мерекелік іс-шаралар қаланың басқа да демалыс орындарында ұйымдастырылды. Қ.Қайсенов атындағы саябақтан бастау алған «Ертіс концерт» шығармашылық ұжымдары мен солистерінің концерті орталық Арбатта жалғасты. Ал кешке қарай, сағат 18.00-де, Ж.Жабаев атындағы саябақта қаланы ұлттық аспаптың күмбіріне бөлейтін тағы бір концерттік бағдарлама ұйымдастырылды.
— Бұл — бірнеше жылдан бері Ұлттық домбыра күні деп аталып, Қазақстанның барлық қалалары мен ауыл-аймақтарында тойланып келе жатқан мереке. Ұлттық құндылыққа, ұлттық өнерімізге құрмет көрсету – біздің азаматтық парызымыз. «Нағыз қазақ – қазақ емес, нағыз қазақ – домбыра»,- деп қазақтың белгілі ақыны Қадыр Мырзалиев ағамыз жырлап кеткендей, домбыра — қазақтың жаны, қазақтың өзі. Домбыраны ұлықтау дегеніміз – тек қос ішек, бір тиек, тоғыз пернелі аспапты ғана ұлықтау деген сөз емес. Домбыраны ұлықтау дегеніміз – бұл ұлтты ұлықтау, оның әнін, жырын, күйін, дәстүрін, тарихын, тағдырын ұлықтау. Өйткені қазақтың әні мен күйінде, жырында бүкіл еліміздің тарихы, болмысы, кешегі өткен күні, бүгінгі дәуірі, болашағы бар деп түсіну қажет. Сондықтан домбыраның шанағынан шыққан әрбір шығарманы ұлықтап, қадірлеуіміз керек, — дейді Өскемен қалалық мәдениет бөлімінің басшысы Қалқаман Сарин.
Әрине, жүрегі қазақ деп соққан әрбір адамның өмірінде қара домбыра үлкен маңызға ие. Демек, өнер иелері мен өнер сүйер ел барда шанағынан күміс күй мен жыр төгілетін қасиетті аспаптың ғұмыры ұзақ болады.
«СТ» — ақпарат