Абай облысының әкімі Нұрлан Ұранхаев ШҚО әкімі Даниал Ахметовпен кездесті. Екі өңірдің әкімдері аумақты бөлу мәселелерін талқылады. Басты тақырып өңірлердің барлық бейінді басқармалары мен ведомстволарының өкілдерімен бірлескен жұмыс тобын құру туралы болды.
— Топтың негізгі мақсаты – өтпелі кезеңді үйлестіру, ол үшін қолайлы жағдай жасау. Осы кезеңде, жаңадан құрылған облыстың бюджеті әлі айқындалмаған кезде, тіршілікті қамтамасыз ететін барлық объектілер мен жүйелердің үздіксіз жұмыс істеуін, сондай-ақ жаңа өңір үшін маңызды барлық жобалардың аяқталуын қамтамасыз ету аса маңызды. Бұл – ел Президентінің тікелей тапсырмасы, оны орындау қажет, — деп атап өтті Даниал Ахметов.
Абай облысы әкімінің айтуынша, қазіргі таңда өңірдің жаппай біліммен қамту үлесі еліміз бойынша ең жоғары көрсеткішке ие. Жаңа оқу жылының басына дейін Абай облысының көп балалы және аз қамтылған отбасыларының барлық балалары мектеп формасымен, оқулықтармен және барлық қажетті керек-жарақтармен қамтамасыз етілетін болады. Денсаулық сақтау объектілері де штаттық режимде өз жұмысын жалғастырады, инженерлік инфрақұрылымға, атап айтқанда жылыту маусымына дайындық мәселелеріне ерекше назар аударылады. Сонымен қатар алдағы уақытта «әлсіз» жерлерді анықтау мен осы бағыттардағы жұмысты күшейту үшін ағымдағы жағдайды толық, егжей-тегжейлі талдау қажет.
— Біздің бастамамыз бойынша барлық басқармалар жүйелі түрде үйлестіріледі. Барлық әлеуметтік және инженерлік инфрақұрылымның барабар жұмыс істеу мәселелері түйінді болып қала береді. Екі облыстық топтың басшылары бірнеше күн ішінде барлық объектілердің жұмыс істеуі көзделетін бірлескен жоспар әзірлеуге тиіс. Біз аудандарға көмір жеткізуді, Семейдегі Өскемен көшесін жөндеуді, сондай-ақ Степное кентіндегі мектептің құрылысын аяқтауды өз мойнымызға аламыз. Күн сайын барлық басқарма басшыларының есептерін тыңдайтын боламын. Бұл жұмыс — жемісті ынтымақтастыққа жасалған тағы бір қадам,- деді ШҚО әкімі Даниал Ахметов.
Абай облысының әкімі Нұрлан Ұранхаев өз кезегінде ШҚО әкіміне өзекті мәселелерді шешуде жеделдік танытқаны үшін алғысын білдірді.
— Бұл — екі облыстың одан әрі жемісті ынтымақтастығына жасалған тағы бір қадам. Бізді көп нәрсе байланыстырады. Біз тату көршілік қарым-қатынастарымызды одан әрі нығайта беретін боламыз, — деді Нұрлан Ұранхаев.
Кездесуден соң Нұрлан Ұранхаев пен Даниал Ахметов теннис орталығында, Халифа Алтай мешітіндегі ислам мәдениеті мұражайында және Өскемендегі жеңіл атлетика кешенінде болды.
Абай облысы әкімдігінің мәліметі бойынша әзірленді
