Абай облысының әкімі Нұрлан Ұранхаев “Абыралы — Дегелең” қоғамдық қорының мүшелерімен және Абыралы өңірінен шыққан танымал азаматтармен кездесті.
Басқосуға экономика ғылымдарының кандидаты, тарих ғылымдарының докторы, профессор Болатбек Нәсенов, көрнекті мемлекет және қоғам қайраткері, Алматы облысының Құрметті азаматы Төлеужан Садықұлов, Қазақстанның Еңбек Ері, Қазақстанның бас онколог дәрігері Мұхтар Төлеутаев, Құрметті теміржолшы, зейнеткер Мақсұт Қосжанов, Қазақстан Жазушылар одағы басқарма төрағасының орынбасары, ақын, филология ғылымдарының докторы, профессор, Ұлттық ғылым академиясының корреспондент мүшесі Бауыржан Жақып, Қайнар шаруашылығының басшысы болып қызмет атқарған «Абыралы — Дегелең» қоғамдық қорының мүшесі Арқалық Ағыбаев, «Абыралы — Дегелең» қорының және «Ақшың» корпорациясының президенті Марат Құрманбай, ҚР-ның еңбек сіңірген энергетигі, зейнеткер Ғабиден Мұсайынов, Қараөлең ауылдық округінің Қоғамдық кеңесінің төрағасы Серғазы Игіліков қатысты.
Кездесу барысында қатысушылар Абыралы өңірінің бүгіні мен болашағына қатысты өздерінің ұсыныс-тілектерін жеткізді. Абыралы өңірінің тарихына шолу жасап, өңірдің аймағымыздың ауыл шаруашылығы саласында әлеуеті зор әрі алдыңғы қатарда екенін атап өтті.
«Абыралы елі аса ауыр қасіреттерді, аумалы-төкпелі кезеңдерді басынан өткізсе де, ауыл шаруашылығы бойынша әлеуеті мықты өңір болып табылады. Мұнда Қараөлең, Алғабас, Абыралы, Ақбұлақ, Айнабұлақ ауылдық округтері орналасқан. Өңір аумағында 773 отбасы, 4 мыңға жуық адам тұрады. Округ елді мекендері 1 702 264 гектар аумақты алып жатырқұрайды. 140 шаруа қожалығы тіркеуде тұр. Оларда 32 796 бас ірі қара, 52 408 бас ұсақ мал, 30 038 жылқы өсіріліп отыр.
Қазіргі уақытта Абыралы өңірінде халық саны көбейіп келеді, экономикасын жандандырып, өркендетуге толық мүмкіндіктер бар, — дейді басқосуға қатысушылар. Олар облыс басшысы Нұрлан Ұранхаевтан Абыралы ауданын қайта құру мәселесіне назар аударуын сұрады.
Кездесуге қатысқан азаматтардың сөздерін тыңдай келе аймақ басшысы өңірдің келешектегі дамуын айқындау үшін жауапты мамандар тартып, жан-жақты зерттеп, зерделеу қорытындысы бойынша нақты ұсыныстар әзірленетіндігін айтты.
«Полигонының эпицентрі болған, халқы 40 жыл атом бомбасының зардабын көрген Абыралы өңірінде тарихи әділеттілікті орнату қажет деп есептейміз. Жоғарыдағы ұсыныстар бойынша халықтың талабын ескеріп, дұрыс шешім қабылдайды деп сенеміз», — деп түйіндеді сөздерін өңір азаматтары.
Кездесу соңында елімізге белгілі тарихшы ғалым Болатбек Насенов пен ақын-жазушы Бауыржан Жақып құнды еңбектерін облыс әкіміне тарту етті.
Бердібек ҚАРЫНБАЙ
