Шығыс Қазақстан облысының әкімі Д. Ахметов пен Абай облысының әкімі Н.Ұранхаевтың ресми кездесуінен кейін, 12-13 шілде күндері, Абай облысының жұмыс тобы Өскемен қаласына іссапармен барды.
Әкімдердің бірінші орынбасарлары мен салалық басқармалар басшыларының кездесуі барысында екі облыстың бюджеті мен коммуналдық мүлкінің бөлінісіне қатысты мәселелер қаралды.
Кездесуде білім беру саласын қаржыландырудың проблемалық мәселелеріне баса назар аударылды. Қосымша қаржыландыру мәселесін анықтап алу үшін екі облыс басқармаларының басшылары мен мамандары бірлесіп Оқу-ағарту министрлігіне жүгінетін болады.
Сондай-ақ тұрмыстық қалдықтарды төгетін полигондарды заңдастыру, бірлескен қоғамдық тыңдаулар өткізу, әлеуметтік желілерге бірлескен мониторинг жүргізу және өңірлердегі экологиялық жағдайды жақсарту жөніндегі жұмыстарды оңтайландыру қажеттігі айтылды.
Бюджет параметрлері нақты келісілгеннен кейін, 1 тамыздан бастап бөлек бюджет пен облыс бюджеттерін бекіту бойынша облыс мәслихаттарының сессияларын кезең-кезеңімен өткізу жоспарланды.
Сондай-ақ Семей қаласындағы «Адал» сауда желісіне 20 тонна қант жіберуге қатысты да сөз қозғалды. Тамыз айында “Ертіс” ӘКК бағыты арқылы қосымша 6 вагон (360 тонна) қант жіберу жоспарлануда.
Абай облысының әкімдігі
