Шығыс кентінде биылғы жылдың 2 мамырында басталған көше жолын кеңейту жұмыстары жалғасуда. Бұл жоба аталған Усть-Каменогорская көшесі бойындағы негізгі магистральда көлік легін азайту үшін және Шайжүнісов көшесінен 6-линия көшесіне дейінгі жолдың өту бөлігін кеңейту мақсатында әзірленген. Ұзындығы — 2 шақырым. Мердігерлік ұйым – «Терезе» ЖШС.
Семей қаласының әкімі Бақытжан Байахметов өткен аптада Шығыс кентіне барып, Усть-Каменогорская көшесіндегі жөндеу жұмыстарының барысымен танысып қайтты.
Бүгінгі күні Көшкінбаев көшесімен 3-ші линия көшесіне дейін Аюченко көшесіне шығатын батпақты бөлік арқылы айналма жолды орнату және нығайту жұмыстары аяқталды.
«Біріккен ЭнергоСервистік Компаниясы» АҚ электрмен қоректендіру тірегін ауыстырғаннан кейін айналма жол пайдалануға берілді, ал Усть-Каменогорская көшесіндегі негізгі бағыт бойынша жолдар жабылды. Мұнда жер төсемін орнату жұмыстары басталды, сондай-ақ автобус павильондарын жөндеу, жарықтандыру тіректерін ажырату және бөлшектеу жұмыстары жүргізіледі.
— Жоба екі жылға жоспарланған, бірақ қала әкімінің тапсырмасы бойынша жұмыстарды биылғы жылы аяқтау қажет. Сондықтан да, егер қаражат бөлінетін болса, біз нысанды ағымдағы жылдың қараша айында тапсырамыз. Қазіргі уақытта мұнда 20 техника тартылған, 50 жұмысшы еңбек етіп жатыр. Жалпы, шамамен 50-60 техника жұмыс істеуде», — деді жоба жетекшісі Айдын Қапсаттар.
Айта кетейік, Усть-Каменогорская көшесіндегі жөндеу жұмыстары кезінде «Авторынок» ауданы маңында кабельдер табылған. Қала әкімі Бақытжан Байахметов мердігер ұйымға кабельдердің кімге тиісті екенін анықтау үшін «Қазақтелеком», «Транстелеком», «Шығыс Қазақстан аймақтық энергетикалық» компаниясы және басқа да компаниялар өкілдерімен жиын өткізіп, акт жасауды тапсырды.
Қала басшысы Бақытжан Байахметов жұмыстар кестеге сәйкес жалғасуы қажеттігін атап өтті.
