Ел Президенті Қасым-Жомарт Тоқаевтың Жаңа Қазақстан құру бастамасын халқымыз дамудың жаңа кезеңіне жасалған қадам деп қабылдаған болатын. Еліміздің қайта жандануына, өркендеуіне жаңа жол ашылады деп сендік. Мемлекет басшысы Үкіметтің күні кеше ғана өткен кеңейтілген отырысында сөйлеген сөзінде таңдаған жолымыздың адастырмайтынын айтып, жаңару үшін қалай жұмыс істеуіміз қажет екенін, қандай міндеттерді жүзеге асыруға тиіс екенімізді тағы бір мәрте нақтылап берді.
Қасым-Жомарт Кемелұлы, күрделі геосаяси сын-қатерлерге қарамастан, еліміздің бірқалыпты дамып келе жатқанын атап өтті. Биылғы бірінші жарты жылдықтың қорытындысы бойынша, экономика 3,4 пайызға, ал нақты сектор 4,1 пайызға өскенін, әсіресе өңдеу өнеркәсібі саласында айтарлықтай ілгерілеу бар екенін атты.
– Инфляция бір орында тұрған жоқ. Қазір бұл көрсеткіш 14,5 пайызға жетіп, 2015 жылғы деңгейден асып түсті. Бірінші жарты жылдықта экономикамыз қалпына келді. Бірақ халықаралық институттар Қазақстанның ішкі жалпы өнімі биыл 2 пайызға ғана өседі деп болжап отыр. Бұған дейін олар өсім 3,7 пайыз болатынын айтқан еді. Сондықтан Үкімет ел экономикасының орнықты дамуын қамтамасыз етуге тиіс. Ең бастысы, азаматтардың нақты табысын арттыру қажет, – деді Президент.
Қасым-Жомарт Тоқаев Үкімет мүшелері мен әр деңгейдегі әкімдерге халықты алаңдатқан бірқатар өзекті мәселені шешуді тапсырды. Әсіресе инфляцияны және азық-түлік тауарларының бағасын тұрақтандыру, азаматтардың табысын арттыру және адами капиталды дамыту, ақша-несие және салықтық-бюджет саясатын жетілдіру, экономиканың нақты секторына қолдау көрсету, энергетикалық қауіпсіздікті қамтамасыз ету, автожол инфрақұрылымын дамыту сияқты мәселелер бойынша нақты міндеттерді саралап берді.
Мемлекет басшысы Премьер-министр Әлихан Смайыловтың және Ұлттық банк төрағасы Ғалымжан Пірматовтың баяндамаларын тыңдап, Үкімет жұмысын орташа деп бағалады. Еліміздің әлеуметтік-экономикалық дамуына қатысты бірқатар міндеттерді талдап көрсеткен Президент министрлер мен әкімдерге, ведомстволар мен ұлттық компаниялардың басшыларына жұмыс қарқынын барынша күшейтіп, жаңа әдістер мен тың идеяларды пайдалану қажет екенін ескертті.
Мэлс ИМАНБЕКОВ,
Ақсуат ауылдық округінің әкімі,
Ақсуат ауданы
