Біздің елімізде мемлекеттік сатып алуды реттеу маңызды. Себебі бөлінген қаржы оңтайлы жұмсалмай жатады. Пара алу жағдайлары қандай мекемелерде орын алады? Әрине, мемлекеттік тапсырысты орындайтын мекемелерде. Қанша жерден жұмыстарын ашық көрсетіп жатқанымен, түрлі мәселелер туындап жатыр. Президент, міне, осы мәселе бойынша тапсырма берді.
Үкіметке «ҚазАвтоЖол» және «Казахавтодорды» біріктіріп, Қазақстанның біртұтас автожол компаниясын құруды тапсырғаны да көңілімізге қонды. Екі компанияның бірі жауапкершілігі шектеулі серіктестік, екіншісі мемлекеттік мекеме болса да, құрылымдары өте ұқсас, атқаратын жұмыстары бірдей. Бұл мемлекет үшін деген тиімділікті төмендетеді. Екіншіден, функциясы бірдей компанияларды біріктіру қаржыны үнемдеуге, дұрыс басқару жүйесінің пайда болуына ықпал етеді.
Тағы бір мәселе жол бойындағы қызмет көрсету саласына қатысты. Нұр-Сұлтан, Көкшетау қалаларына үлкен жолдар жасалынған, алайда қызмет көрсететін орындар жоқ. Жол үстіндегі қызмет сапасын жақсарту керек, жолаушылар үшін тамақтанатын орындар, тағы басқа да нысандар, таза дәретханалар салынса деген ойым бар. Біз үшін қалалар арасын байланыстыратын жолдардың сапасы маңызды. Берілген тапсырмалардың орындалуы бизнес пен туризм үшін де, жеке адам үшін де маңызды.
Қуаныш МОЛДАҚАШЕВ,
«Интеллектуалды жастар» қоғамдық қорының төрағасы
