Бүгінгі таңда еліміздегі барлық сауда желілеріндегі, өңдеуші кәсіпорындардағы, қоймалардағы және тұрақтандыру қорларындағы, сонымен қатар өңірлермен форвардтық келісімшарттар бойынша жасалған қант қоры 26,9 мың тоннаны құрайды, деп хабарлады Zakon.kz.
Нақтылай айтар болсақ, ауыл шаруашылығы министрлігінің БАҚ өкілдеріне берген соңғы мәліметі бойынша, республиканың қантқа деген жылдық қажеттілігі — орташа есеппен 550 мың тонна. Отандық шикізатты өңдеу және құрақ қанты шикізатын өңдеу арқылы ішкі нарықты қамтамасыз ету 43% болса, оның ішінде қызылша қанты — 7%, құрақ қант шикізаты 36% болып отыр.
— Өткен жылы республикада ішкі қантты тұтыну көлемі 532,5 мың тонна болды. Мысалы, қант зауыттары 226,7 мың тонна қант, оның ішінде 35,7 мың тонна қант қызылшасын және 191 мың тонна құрақ қант өндірді. Тұтынудың жалпы көлеміндегі қант импорты 308,5 мың тоннаны, немесе 57%-ды құрайды. Ресей Федерациясынан импорттың жалпы импорттағы үлесі — 88,3%, Беларусьтен — 11,5%, басқа елдерден — 0,15%, — дейді ҚР Ауыл шаруашылығы вице-министрі Жеңіс Өсербай.
Бұл ретте облыс әкімдіктері ағымдағы жылғы 16 шілдедегі жағдай бойынша, бөлшек сауда желілеріндегі, өңдеуші кәсіпорындардағы, қоймалардағы, тұрақтандыру қорларындағы, сондай-ақ өңірлермен форвардтық келісімшарттар бойынша жасалған қант қоры 26,9 мың тонна болатынын хабарлады. Оның ішінде Шығыс Қазақстан облысында 1001,5 тонна қант қоры бар.
Бұл — күн сайын сатылатын және толықтырылатын белгілі бір уақыттағы қант қоры. Сонымен қатар отандық зауыттар қант өндірісін тоқтатпайды, қорлар үнемі толықтырылып отырады.
Бұл ретте вице-министр қант тапшылығын шешу үшін Ауыл шаруашылығы министрлігі қабылдаған шаралар туралы айтты.
— Ішкі нарықтың қантқа деген сұранысын тұрақты қамтамасыз ету үшін министрлік үшінші елдерден 350 мың тонна көлемінде қант пен өңдеуге арналған шикізатты бажсыз әкелу шарасын қабылдап жатыр. Оның 250 мың тоннасы қазір шетелдік сауда қатысушылары арасында таратылуда. Қазір 100 000 тонна көлемдегі қалған квотаны бөлу жұмысы жүріп жатыр, — деді Жеңіс Өсербай.
Ерлан АЙҚЫНҰЛЫ,
«Семей таңы»