Қала әкімінің орынбасары Дархан Жөргекбаев Юность, Комсомол, Ұшақтар, Треугольник және 66-шы квартал ауданы тұрғындарымен кездесу өткізді.
Жиында Дархан Жөргекбаев өткен алты айда қалада атқарылған жұмыстар мен алда тұрған міндеттер туралы баяндады.
Қала әкімінің орынбасары осындай кездесулер барысында, сондай-ақ әлеуметтік желілерді мониторингілеу және жазбаша өтініштерді қарау кезінде түйткілді мәселелер анықталатынын атап өтті. Оның айтуынша, тұрғындардан түскен өтініштер мен тілектерді ескере отырып, 252,5 млрд теңге сомасына әлеуметтік тәуекелдер картасы жасалған. Онда 2022-2023 жылдарға арналған қысқа мерзімді кезеңге 94,6 млрд теңге және орта мерзімді кезеңге 157,9 млрд теңге бөлінген. 2022 жылға арналған әлеуметтік тәуекелдер картасы бойынша 199 мәселені шешу үшін бюджеттен 34,3 млрд теңге көлемінде қаржы бөлу қажет.
Дархан Жөргекбаев қала әкімдігі бұл мәселелерді депутаттармен бірлесіп заңнама шеңберінде бюджетке енгізу арқылы шешуге тырысатынын, ал қаржыландыруды қажет етпейтін мәселелердің шешімі дереу қарастырылатын айтты.
— Ең өткір проблема — қала инфрақұрылымының тозуы. Соңғы жылы оны жақсарту бағытында бірқатар жұмыстар атқарылды. Өткен жылы жол инфрақұрылымын дамытуға 4,6 млрд теңге бөлінсе, оның 1,1 млрд теңгесі Қарағайлы ауданындағы кварталішілік жолдардың құрылысын аяқтауға жұмсалған. 3,1 млрд теңге көлемінде 118 көшеге жөндеу жұмыстары жүргізілді, оның ішінде топырақ жамылғысы бар 27 көшеге құм-қиыршық тас қоспасы мен шақпатас себілді, — деді Дархан Жөргекбаев.
Жиын барысында қала көшелерін жарықтандыруға ерекше көңіл бөлінетіні де атап айтылды. Өткен жылы 188 көшеде 7 659 жарық шамдары ауыстырылса, 2022 жылы жарығы жоқ 100 көшеге 3 295 жарық шамдарын орнату жоспарланып отыр. Сонымен қатар жылумен жабдықтау нысандарын жөндеуге 1,4 млрд теңге қаржы жұмсалған. Бұл жұмыстар өткен жылдың жылыту маусымын үзіліссіз өткізуге мүмкіндік берді.
2023 жылы жарығы жоқ көшелерге 8 600 шам орнатып, 252 көшені жарықтандыру жоспарлануда. Үш жыл ішінде алғаш рет қаланың 352 көшесіне жарық орнатылады.
Ағымдағы жылы Селевин көшесінен соңғы аялдамаға дейін Парковая көшесін, Юность кентіндегі №6 отбасылық-дәрігерлік амбулаторияға барар жолды, сондай-ақ Селевин көшесінен темір жол өткеліне дейінгі Автодорожная көшесін орташа жөндеу жұмыстары жоспарланған.
— Бүгінгі таңда мердігер ұйымды анықтау мақсатында конкурс өткізілуде. Мердігер компания анықталғаннан кейін жұмыстар кестеге сәйкес жүргізіелетін болады, — деді қала әкімінің орынбасары.
Бүгінгі күні Парковая көшесінен Селевин көшесіне оң жақ бұрылыс орнату жұмыстары басталды. Сол сияқты 35,2 млн теңге қаржыға Ұшақтар кенті мен Оралмандар кентіндегі ұзындығы 5,1 шақырымды құрайтын 8 тұйық көшеге құм-қиыршық тас қоспасы мен шақпатас төселіп, жөндеу жұмыстары аяқталды.
Ағымдағы жылы 66-шы квартал ауданында 1 ауланы абаттандыру үшін 33,2 млн теңге бөлінді. Қазіргі уақытта конкурстық рәсімдер жүргізілуде.
Комсомол, Ұшақтар, Юность кенттерінде және Селевин көшесінде балаларға арналған 4 алаңды орнатуға келісімшарттар жасалды, сонымен қатар Треугольник ауданында балалар және спорт алаңын, футбол алаңын орнату бойынша конкурстың қорытындысы шығарылды (мердігерлік ұйым — «СтройГруппPVL» ЖШС).
2025 жылға дейін Юность, Комсомол, Ұшақтар, Треугольник және 66-шы квартал шағын аудандарын дамытуға 95,2 млрд теңге жоспарлануда.
Кездесу барысында қала тұрғындары бірқатар мәселелерді көтеріп, атқарылып жатқан жұмыстарға қатысты шағымдары мен ұсыныстарын айтты. Алдағы уақытта тұрғындардың барлық өтініштері мен шағымдары ескеріле отырып, тиісті шаралар қолданылады деген ойдамыз.
Талшын ҚАЛИАСҚАР,
«Семей таңы»
