Абай облысы әкімінің бірінші орынбасары Айдын Кәрімов Нұр-Сұлтан қаласына жұмыс сапарымен барып, ҚР Энергетика министрі Болат Ақшолақовпен келіссөздер жүргізді. Кездесу барысында Үржар және Ақсуат аудандарына жанар-жағармайды үздіксіз жеткізу мәселесі талқыланды.
ҚР Энергетика министрлігінің ұсынысы бойынша, кейіннен мұнай өнімдерінің қажетті көлемін сатып алу бойынша биржалық сауда-саттыққа қатысу үшін Абай облысындағы жеке жанармай құю станцияларын биржада тіркеуге қатысты бірлескен жұмыс басталды.
Бұл жанар-жағармайды тікелей ресурс ұстаушылардан делдалдарсыз сатып алуға мүмкіндік береді. Нақты уақыт режимінде мониторинг жүргізу мақсатында облыстың жанармай құю станцияларын Энергетика министрлігінің мұнай өнімдерін есепке алу жүйесіне қосу жұмыстары басталды.
Естеріңізге сала кетейік, өткен аптада Үржар ауданында, ішінара Аягөз өңірінде де жергілікті жекеменшік жанар-жағар май құю станцияларында жеткізуші оператордың кемшілігінен бірқатар проблемалар туындап, соның нәтижесінде жанар-жағармай тапшылығы байқалған болатын. Сонымен қатар Алакөлдегі туристік маусымның шырқау шегіне жетуі, яғни Ресей мен еліміздің өзге өңірлерінен келетін автокөліктер санының артуы да жанармайға деген қажеттілікті арттырып жіберген.
Осыған байланысты жедел түрде жанар-жағармаймен қамтамасыз ету жөнінде шаралар әзірленді. «Petro Retail» ЖШС («Qazaq Oil» ЖМҚС желісі) Қабанбай ауылы маңындағы екі жанармай құю бекетіне 60 тонна бензин берді, сондай-ақ өз ресурстарынан 625 тонна автобензин құюға Ақсуат ауданының тағы төрт жанармай құю станциясына жеткізді.
Абай облысы әкімінің баспасөз қызметі хабарлағандай, дәл қазіргі күні бұл мәселелер біршама шешілген. Жанармай мәселесі аймақ басшысының назарында тұр.
Әли СҮЛЕЙМЕН,
«Семей таңы»
