Экономикалық зерттеулер институты Абай облысының 2030 жылға дейінгі даму стратегиясын әзірлеу кезінде әдістемелік қолдау көрсетеді. Басты мақсат – жаңадан құрылып жатқан облыстың әлеуметтік-экономикалық әлеуетін көтеру, аймақтағы кәсіпкерлікке жан-жақты түрде қолдау жасау.
Бұл туралы Абай облысы әкімінің бірінші орынбасары Айдын Кәрімовтің «Экономикалық зерттеулер институты» АҚ басқармасының төрағасы Руслан Сұлтановпен кездесуінен кейін белгілі болды.
Сонымен қатар Айдын Кәрімов «Даму» кәсіпкерлікті дамыту қоры» АҚ басқармасының төрайымы Гаухар Бөрібаевамен де кездесіп, аталған тақырып аясында пікір алмасты.
Кездесу барысында облыста кәсіпкерлікті дамыту мәселелері талқыланды. Микро және шағын кәсіпкерлікті қолдаудың маңыздылығы атап өтілді, аудан орталықтары мен ауылдық жерлерде жаңа жобаларды дамытуға ерекше көңіл бөлінді.
Жалпы, ағымдағы 2022 жылдың бірінші жарты жылдығының қорытындысы бойынша, Абай облысында кәсіпкерлікті дамытудың 2021-2025 жылдарға арналған ұлттық жобасы аясында 88 жоба субсидияланды.
Жыл соңына дейін «Микро және шағын кәсіпкерлікті қолдау» бағыты шеңберінде 350 — ден астам жобаны және «Кәсіпкерлерді/индустриялық-инновациялық қызмет субъектілерін қолдау» бағыты шеңберінде 60-тан астам жобаны қолдау жоспарда бар.
Жалпы, соңғы уақыттарда Абай облысына «Экономикалық зерттеулер институты» АҚ мен «Даму» кәсіпкерлікті дамыту қоры» АҚ-ның қолдауы зор болып тұр. Бұл бағыттағы жұмыстар іскерлік әріптестік аясында алдағы уақыттарда да жалғаса бермек.
Азамат ЕРСАЙЫН,
«Семей таңы»
