Семейдегі Әлихан Бөкейхан университетінде «Қазақстан халқына» қоғамдық қорының басқарма төрағасының орынбасары Ляззат Шыңғысбаеваның қатысуымен дөңгелек үстел өтті. Дөңгелек үстел жұмысына облыс әкімінің бірінші орынбасары Айдын Кәрімов, облыстық мәслихат хатшысы Қуаныш Сүлейменов, мәслихат депутаттары, университет басшылары, қоғам белсенділері қатысты. Сонымен қатар аудан басшылары Zoom қосымшасы арқылы онлайн байланыста болды.
Шараның басты мақсаты – жергілікті атқарушы органдар, депутаттық корпус, бизнес, үкіметтік емес сектор, университет басшыларымен бірлесіп еліміздегі қайырымдылық саласын дамытудың тиімді жұмыс моделін құру.
Облыс әкімінің бірінші орынбасары Айдын Кәрімов аймағымыздағы әлеуметтік және басқа да қолдау шаралары туралы айтты. Сонымен қатар, облыс азаматтарының өмір сүру сапасын жақсартуға бағытталған жұмыстарды қормен бірлесіп атқаруға әзір екенін жеткізді.
Дөңгелек үстел басында қоғам белсенділері мен мәслихат депутаттары қор қызметіне қатысты сұрақтарын қойып, қаладағы медицина, әлеуметтік саладағы мәселелерді қозғады.
Шара барысында Абай облысы мен «Қазақстан халқына» қоғамдық қоры екі жақты меморандумға қол қойды.