Облыстың құрылуына байланысты Қазақстан Республикасы Президентінің Жарлығымен 2022 жылғы 24 тамызда Абай облысынан ҚР Парламенті Сенатының депутаттарын сайлау өтетіні белгілі. Осыған орай қалалық ақпарат орталығында брифинг өтті.
Облыстан 2 депутат: біреуі 2017 жылғы 28 маусымда сайланған депутаттардың өкілеттік мерзіміне, екіншісі 2020 жылғы 12 тамызда сайланған депутаттардың өкілеттік мерзіміне сайланады.
Абай облысы бойынша аумақтық сайлау комиссиясының төрағасы Наталия Фесенко Сенат депутаттығына кандидаттар ұсыну «ҚР Сайлау туралы» конституциялық заңына сәйкес (71-бап) мәслихат сессияларында және өзін-өзі ұсыну тәртібімен өткізілетінін атап өтті. Сондай-ақ Сенат депутаттығына кандидат ретінде мәслихат депутаты, облыс аумағында тұратын басқа азаматтар да ұсыныла алады.
— Кандидаттарды ұсыну 13 шілдеден басталып, 30 шілде күні сағат 18-де аяқталды. Осы кезеңде өз кандидатурасын ұсыну арқылы барлығы 11 адамнан өтініш келіп түсті. Ұсынылған кандидаттар арасында 5 ер адам, 6 әйел адам бар. Олардың орташа жасы — 49 жас, кандидаттардың ең жасы 39-да, ең үлкен кандидат 60 жаста. Мамандығына келсек, үш кандидат – заңгер, тағы үшеуі – ауыл шаруашылығы қызметкері (зоотехник, мал дәрігері, агроном) және екі оқытушы, екі дәрігер, бір қаржыгер бар. Кандидаттардың арасында мемлекеттік кәсіпорындар мен мекемелердің, әкім аппараты мен мәслихат қызметкерлері, коммерциялық құрылымдардың қызметкерлері бар, — деді Абай облысы бойынша аумақтық сайлау комиссиясының төрағасы Наталия Анатольевна.
Наталия Анатольевна үміткерлерге қойылатын талаптар туралы айтып өтті.
Облыстық сайлау комиссиясы үш күн ішінде кандидаттардың Конституция мен осы конституциялық заңның талаптарына сәйкестігін анықтайды. Тексеру аяқталған күннен бастап үш күн мерзімде сайлаушылардың қолдарын жинау үшін қол қою парақтары беріледі. Кандидаттар облыстың барлық мәслихаттарынан сайланған сайлаушылардың жалпы санының он пайызынан кем емес, бірақ бір мәслихаттан сайлаушылар дауысының жиырма бес пайызынан аспайтын қол жинауы тиіс.
— Сенат депутаттығына облыс атынан үміткер облыстың барлық 11 мәслихатынан сайланған кемінде 13 сайлаушының қолдауына ие болуы керек. Облыстан екі депутат сайланатындықтан әрбір сайлаушы Сенат депутаттығына екі кандидатты қолдау мақсатында өз қолын қоюға құқылы, — деп атап өтті Наталия Анатольевна.
Барлық өтініштер қаралып, қанағаттандырылды. Кандидаттар тіркелгенге дейін және тексеруден өткеннен кейін он бес еселенген мөлшерде сайлау жарнасын төлеп, тұрғылықты жері бойынша кіріс органдарына өзінің және жұбайының (зайыбының) активтері мен міндеттемелері туралы декларацияны табыс етуі тиіс. Тіркеу «Сайлау туралы» заңда көзделген құжаттар болған кезде ғана жүзеге асырылады.
2022 жылғы 31 шілдедегі жағдай бойынша, комиссия алты кандидатты тіркеді. Олар «Қайнар» жоғарғы колледжінің директоры Айнұр Арғынбекова, Бесқарағай аудандық мәслихатының хатшысы Мейрамгүл Әбілғазинова, Бородулиха аудандық мәслихатының хатшысы Уәлихан Майжанов, «Эйкос» ЖШС дамыту жөніндегі директоры Ангела Маслова және Семей қаласының әкімі Бақытжан Байахметов пен Көкпекті аудандық мәслихатының хатшысы Талғат Сарманов.
Кандидаттарды тіркеу аяқталғаннан кейін 23 тамызға дейін сайлау алдындағы үгіт-насихат жұмыстары жүргізіледі. Сенат депутаттарын сайлау сайлаушылардың бірлескен отырысында өтеді. Егер бірлескен отырысқа облыстың барлық 11 мәслихатының депутаттары санының елу пайызынан астамы қатысса, бірлескен отырыс заңды болып табылады. Сайлау нәтижелері 30 тамызда жарияланады.
Дана ТАЛҒАТБЕК,
«Семей таңы»
