AMANAT партиясы Шығыс Қазақстан облыстық филиалы жанындағы Өңірді дамыту бойынша қоғамдық кеңестің отырысы өтті.
Жиынның күн тәртібінде Шығыс Қазақстан облысы кәсіпорындарының қызметкерлері арасында еңбек заңнамасын сақтау туралы, сондай-ақ жұмыссыздықты азайту және халықтың табыс деңгейін арттыру бойынша қабылданып жатқан шаралар туралы (партияның облыстық сайлауалды бағдарламасын орындау жөніндегі Жол картасының 9-тармағының іске асырылуы бойынша) екі мәселе қаралды.
— Еңбек қауіпсіздігі және еңбекті қорғау туралы заңнаманың сақталуын мемлекеттік және ішкі бақылаудың тиімділігін арттыру бойынша кешенді шаралар қабылдау мақсатында өткен жылы Шығыс Қазақстан облысында 2025 жылға дейін Қауіпсіз еңбек жағдайларын қамтамасыз ету жөніндегі іс-қимыл жоспары бекітілді. Еңбек қауіпсіздігі және еңбекті қорғау талаптарының сақталуына ішкі бақылауды жүзеге асыру үшін кәсіпорындарда 1950 техникалық инспектор қызметін жүзеге асырады, еңбек қауіпсіздігі және еңбекті қорғау жөніндегі 1298 өндірістік кеңес құрылды, — деді сөз орайында Шығыс Қазақстан облысы Мемлекеттік еңбек инспекциясы басқармасының басшысы Бақытбек Қизатов.
Жастарды тұрақты жұмысқа орналастыру және жастарды қолдау партияның негізгі басымдықтарының бірі болып табылады.
— Қазақстан Республикасының Президенті Қ.К.Тоқаевтың 2022 жылғы 11 қаңтардағы ҚР Парламенті Мәжілісінің отырысында берген тапсырмасына сәйкес, 2022 жылдан бастап осы жобаларға қатысушыларға мемлекеттік бюджеттен субсидиялар есебінен төленетін жалақы мөлшері едәуір ұлғайды. «Жастар тәжірибесі» жобасы бойынша жалақы 25 АЕК – тен (76575 теңге) 30 АЕК-ке (91 890 теңге), «Бірінші жұмыс орны» жобасы бойынша 20 АЕК-тен (61 260 теңге) 30 АЕК-ке (91 890 теңге) дейін ұлғайтылды. Ағымдағы жылы «Жастар практикасы» бойынша 165 адам, «Бірінші жұмыс орны» жобасы бойынша 25 адам қамтылды, — деп атап өтті бұл ретте Шығыс Қазақстан облысының жұмыспен қамтуды үйлестіру және әлеуметтік бағдарламалар басқармасы басшысының орынбасары Досхан Қайырғазинов.
«СТ» ақпарат
