Жуырда Зайсан ауданына қарасты Дайыр, Қаратал ауылдық округтерінде, сондай-ақ Сарытерек ауыл-дық округіне қарасты Қарой егін учаскесінде, яғни «QABYL AGRO» шаруа қожалығының егін алқабында «Ауыл» халықтық-демократиялық патриоттық партиясының ұйымдастыруымен шаруа қожалықтардың жетекшілеріне арналған семинар өтті.
Семинарды «Ауыл» халықтық-демократиялық патриоттық партиясының Зайсан аудандық филиалының мүшесі Мәлік Бейсенбаев жүргізді.
Шараға «Ауыл» партиясының хатшысы Анас Баққожаев, аудан әкімінің орынбасары Ринат Тауасаров, кәсіпкерлік және ауыл шаруашылығы бөлімінің басшысы Сабыр Әндірбаев, «Майлы дақылдар тәжірибелік шаруашылығы» ЖШС директорының ғылым жөніндегі орынбасары, ауыл шаруашылығы ғылымдарының кандидаты Юрий Каменов, осы серіктестіктің агрономы Ермек Көшенов, «Ауыл» партиясынан сайланған облыстық мәслихаттың депутаты, «Аграрлық несие корпорациясы» АҚ Шығыс Қазақстан облыстық филиалының директоры Ербол Кубентаев, «QABYL AGRO» шаруа қожалығының жетекшісі Бірлік Мамырбек және ауданның барлық ауылдық округтеріндегі дәнді дақыл егумен айналысып отырған шаруа қожалықтарының жетекшілері қатысты.
Семинар барысында шаруалардың ұсыныс-пікірлері тыңдалып, сұрақтарына жауаптар берілді. Одан кейін қатысушылар егін алқабында болып, тұқым себу, одан шығатын өнімді анықтауға қатысты, бірінші жыл егіліп жатқан гибридті тұқымдастарды өсіруге байланысты ақыл-кеңестер берілді.
«Ауыл» партиясы шаруа қожалықтарына кеңестер беріп, тәжірибе алмасу мақсатында алдағы уақытта басқа округтерде де осындай семинарлар өткізбек.
Ерасыл Кенжебек,
«Семей таңы»
