«Облыс орталығының сол жағалауын дамыту үшін бір уақытта бірнеше перспективалы орындар инженерлік коммуникациялармен толықты. Өскемендегі көп қабатты және жеке тұрғын үйлермен қоса, жаңа тұрғын үй аудандарының құрылыстары да қарастырылды»,- деп хабарлайды ustinka.kz. тілшісі.
Жақын арада 23-ықшам аудан маңындағы жөндеуден өткен Алматы тас жолының бойында 24-тұрғын ауданның құрылысы басталады. Мұнда 223 көп қабатты үй (50 мыңға жуық пәтер) салынады деп күтілуде. Сондай-ақ жоспар бойынша бірнеше мектеп, балабақша және басқа да әлеуметтік инфрақұрылым нысандарының құрылысы жоспарланған. Әзірге қаланың бұл бөлігінде су мен электр энергиясы коммуникацияларын тарту жұмыстары қызу жүріп жатыр. Мердігерлер кварталаралық сумен жабдықтау желілерін, оның ішінде кәріз желісін салу бойынша атқарылған жұмыстар туралы есеп беріп, барлық жұмысты жыл соңына дейін аяқтайтындарын айтады. Ал жарық тарту жұмыстары тек келесі жылдың соңына қарай толық аяқталмақ.
Өскемен қаласының әкімі Жақсылық Омардың айтуынша, мұндағы үлкен құрылыс барлық инженерлік коммуникациялар жүргізілгеннен кейін ғана басталады.
— Құрылысшыларды шақыру үшін біз оларға су, электр, кәріз және жылу беруіміз керек. Бұрын жер телімдері инженерлік желілерсіз берілетін, ал қазір тұрғындар ештеңе жоқ деп шағымданады. Бұл дұрыс емес, — дейді қала әкімі.
21-шағын ауданнан кейін орналасқан 27 шағын ауданда 450-ге жуық жеке тұрғын үйдің құрылысы жоспарланған. Қазір қаланың осы бөлігінде жеті-ақ үй бар, тағы 43 үй салынған, бірақ қажетті коммуникациялардың жоқтығынан бос тұр. Мұнда сумен жабдықтау жүйесі тартылған, ал электр энергиясы келесі жылы ғана пайда болуы мүмкін. Қазір бұл ауданда тұрып жатқандар уақытша электрмен жабдықтау желілерін пайдаланып отыр. Жақын арада әкімдік осы ауданда кезекте тұрғандарға жер беруге жарияланған мораторийді тоқтатады. Сондай-ақ үйлерді сатуға қоятын жеке инвесторларға ішінара құрылыс жүргізуге рұқсат берілуі мүмкін.
Бір кездері 25-ші тұрғын ауданда адамдарға жер телімдерін берген, бірақ алдымен қажетті коммуникациялармен қамтамасыз етуді ескермеген. Қазір мұнда 1099 учаскеге үлкен құрылыс салынады деп жоспарланып отыр, бірақ мердігерлер белгіленген мерзімнен кешігіп жатыр. Сумен жабдықтау бойынша жұмыстар аяқталып, электрмен қамту жұмыстары басталды. Бұл аумаққа сұраныс жоғары екенін атап өткен жөн, қазір мұнда тек 532 жер телімі ғана бос тұр. Сондай-ақ 30 үйдің құрылысын жеке инвестор қаржыландырады. Ол өзінің әлеуметтік инфрақұрылымы бар, газбен жылынатын жайлы тұрғын үй кешенін салуды жоспарлап отыр. Бірінші кезеңде бір қабатты үйлер салынады.
Дана ТАЛҒАТБЕК,
«Семей таңы»
