Ұлы Отан соғысы – өткен жиырмасыншы ғасырдағы ғана емес, бүкіл адамзат тарихындағы алапат соғыс. Фашизмге қарсы бұл соғыста, Бауыржан Момышұлы айтқандай, қазақтар және барлық қазақстандықтар нағыз батырлықтың үлгісін көрсете білді. Ендеше, елі мен жерін жаудан қорғаған жандарды ұлықтап, құрметтеу – біздің парызымыз.
Талшын ҚАЛИАСҚАР,
«Семей таңы»
Осы орайда Шығыс Қазақстан облысының Ұлан ауданында Ұлы Отан соғысының батырларын ұлықтау шараларына арналған жиын өтті. Кезекті рет кеңейтілген құрамда өткен жиында жерлестері – Кеңес Одағының Батырлары І.Айтықов пен С.Борозенецтің 100 жылдық мерейтойына дайындық барысы талқыланды.
Жиында айтылғандай, Батырлардың құрметіне арналған мерекелік, салтанатты іс-шаралар қыркүйек айында өткізіледі деп жоспарлануда.
— Біз жұмыс тобы мүшелерінің тілектерін ескердік. Таврия ауылындағы бір көшеге С.Борозенецтің есімі берілетін болады, — деді Ұлан ауданы әкімі Ренат Құрмамбаев.
Таврия ауылдық округінде соғысқа қатысушыларға ескерткіш, мемориалдық тақта орнатылған. Ал Айтықов ауылында Батырлар саябағы салынуда, сондай-ақ Ізғұтты Айтықовтың портреттік бейнесі кескінделген мүсіні жасалып жатыр. Жақында батырдың ескерткіші ауыл төріне орнатылып, ашылу рәсімі өтеді.
Аудан басшысы жерлес батырлардың мерейтойын жоғары деңгейде өткізуге жергілікті кәсіпкерлер де барынша атсалысады деген сенімде.
— Мұндай шаралар жас ұрпақты дұрыс тәрбиелеу үшін қажет олар елімізді жаудан қорғаған ата-бабаларымызды білуі керек. Әлемді фашизмнен құтқарған алдыңғы буынның есімдері ұмытылмауы керек. Майдангер ата-апаларымыз қандай құрметке де лайық, — деді Ренат Құрмамбаев.