Алтай
Мемлекет басшысы Қасым-Жомарт Тоқаев халықтың жағдайын көзбен көру үшін билік өкілдері ел ішін жиі аралауы керектігін айтқан болатын. Осы ретте ҚР Премьер-министрінің орынбасары, ҚР Қаржы министрі Ерұлан Жамаубаев Шығыс Қазақстан облысына жұмыс сапарымен келіп, Алтай ауданының тұрғындарымен кездесті. Жиынға ШҚО әкімінің міндетін атқарушы Алмасхан Сматлаев, облыстың депутаттары мен қоғам белсенділері қатысты.
Кездесуде бірқатар өзекті мәселелер талқыланды. Соның бірі – бағаның өсуі.
— Үкіметтің күн тәртібінде бірнеше маңызды мәселе бар және олардың бірі – бағаның өсуін ұстап тұру. Мен жақында халықаралық сарапшылармен бірнеше кездесулер өткіздім, бағалар барлық жерде өсіп жатыр. Осыған орай, біз келесі жылы инфляцияны 10%-ға дейін төмендету мақсатын қойып отырмыз, — деді Ерұлан Жамаубаев.
Министрдің айтуынша, тағы бір маңызды мәселе – жаппай кәсіпкерлікті дамыту.
— Биыл біз мемлекеттік органдардың барлық талаптарын тексереміз. Әр мекемеде автоматтандырылған тексеру жүйесі болуы керек. Біз оны келесі жылы іске қосамыз, менің ойымша, бұл елімізде енгізілетін үлкен жаңалық болады, — деді қаржы министрі.
Сондай-ақ кездесу барысында 2023 жылы мемлекет өз кірістерін өсіре бастайтыны және Ұлттық Банкке трансферттер алу үшін аз өтініш берілетіні айтылды.
Сөз соңында Ерұлан Жамаубаев барлық реформаның негізгі мақсаты халықтың әл-ауқатын арттыру және жаңа Қазақстанды гүлденген әрі қуатты мемлекет ретінде құру екенін атап өтіп, тұрғындардың сауалдарына жауап берді.
Мадина ҚАЙНАРОВА
