Семей қаласындағы «Спартак» стадионында Абай облысының әкімі Нұрлан Ұранхаевтың қатысуымен «Елім-ай» қоғамдық қорының ашылуына арналған кездесу өтті. Жиынға аты аңызға айналған футболшылар Самат Смақов пен Андрей Карпович, «Елім-ай» футбол клубының атқарушы директоры Төлеухан Кульдиков пен облыстық мәслихат депутаты С.Байғалиев қатысты.
Қатысушылар 1998 жылы тәуелсіз Қазақстан тарихында тұңғыш рет еліміздің үш дүркін чемпионы атанған футбол командасының қайта жаңғырғанын жариялады. Ашық микрофон форматында өткен кездесуде Абай өңірінде футболды одан әрі дамыту мәселелері талқыланды. Облыс әкімі Абай Нұрлан Ұранхаев пен қоғамдық қордың атқарушы директоры Төлеухан Кульдиков футбол жанкүйерлерінің сұрақтарына жауап беріп, ойыншылар мен жаттықтырушылардың ұсыныстарын тыңдады. Жанкүйерлер тарапынан «Пищевик» футбол алаңы жайлы сұрақтар да болды. Облыс басшысы Нұрлан Ұранхаев аталған футбол алаңының жағдайымен таныс екенін айтып, алдағы уақытта жөндеу жұмыстары жоспарланып отырғанын жеткізді. — Семей қаласында алғашқы футбол ойыны 1913 жылы өткізілген болатын. Семей Қазақстан футболының отаны саналады, осында алғашқы футбол клубтары пайда болды, сондықтан да біздің қалада футбол клубы міндетті түрде болуы керек, жанкүйерлер бұл сәтті көптен күтіп келеді. Біз, атқарушы билік, өз тарапымыздан қолдау көрсететін боламыз, — деді Абай облысының әкімі Нұрлан Тельманұлы. — Қоғамдық қорды ашудағы мақсатымыз — жанкүйерлермен тығыз байланыс орнату. Футболсүйер қауым өздерін осы ұжымның мүшесі ретінде сезінгенін қалаймыз. Кез келген адам осы қордың құрамына кіре алады. Барлығымыз бір отбасыдай болсақ, нәтиже де шығатынын ұмытпайық. Біз 90-шы жылдардағы «Елім-айдың» жетістіктерін қайта жаңғыртқымыз келеді. Клуб келесі жылдан бастап қана өнер көрсете алады. Алғашқы маусымды екінші лигадан бастаймыз және Қазақстан Премьер – лигасының үздік командаларымен кездескенге дейін кемінде үш жыл өте үлкен жолдан өтуіміз керек. Биылғы жоспарымыз — Қазақстан футбол федерациясы мен Қазақстанның кәсіби футбол лигасында сертификат алу. Алдағы уақытта басқа да маңызды жобалар жайлы білетін боласыздар, — деді «Елім-ай» ФК атқарушы директоры Төлеухан Кульдиков. Оған дейін клуб штаты құрылып, бас бапкер лауазымына бірнеше кандидат таңдалуы тиіс. Жұмыс жоспары, «Елім-ай» клубында ойнайтын спортшылардың тізімі жасалады. Негізінен, жергілікті футболшыларға үміт артатын боламыз. Болашақта, егер «Елім-ай» маңызды міндеттерді еңсере алатын болса, легионерлер клубының қатарында өнер көрсетуі де мүмкін. Клубтың алдында өте күрделі мәселелер тұр. Сондықтан шетелдік футболшылардың көмегіне де жүгінуіміз керек, яғни тәжірибелі ойыншылар қажет. Жалпы, «Елім-ай» футбол клубы формасы қызыл, ақ және жасыл түсті. Осы түстер алдағы уақытта да сақталады деп ойлаймын, — дейді Қазақстанның әйгілі футбол маманы Самат Смақов.
Ерасыл КЕНЖЕБЕКОВ,
«Семей таңы»
