10 тамызда еліміз Абай күнін атап өтті. Ал Абай облысының орталығы Семей қаласында ұлы ақынның туған күніне орай он күндік шаралар ұйымдастырылуда.
Онкүндік 8 тамыз күні Невзоровтар отбасы атындағы бейнелеу өнері мұражайында «Ұлылыр үндескенде» атты көрмемен ашылды. Ақын Абай Құнанбайұлы мен заңғар жазушы Мұхтар Әуезовтің және белгілі суретші Евгений Сидоркиннің шығармашылығын халыққа насихаттауға арналған іс-шара Абайдың туған күніне және М.Әуезовтің 125 жылдығы мен «Абай жолы» романының жазылғанына 80 жыл толуына орайластырылды. Көрмеге үш тұлғаның еңбектері қойылып, келген қонақтарға таныстырылды. Евгений Сидоркин — Қазақстанның халық суретшісі. Ол графика мәнеріндегі сурет шебері ретінде танымал болды. «Абай жолы» романы екі рет Е.Сидоркиннің иллюстрацияларымен шыққан. Музей директоры Татьяна Стромскаяның айтуынша, ауқымды көрме қаладағы екі мәдени мекеме — Абай атындағы кітапхана және Абай музейімен бірлесіп ұйымдастырылған. Абай атындағы кітапхананың сирек кітаптар қорынан Абай Құнанбаевтың өмір жолын сипаттайтын 41 құнды басылым ұсынылды. Евгений Сидоркиннің 24 түпнұсқа суреттерін Абай мұражайы ұсыныпты. Көрмеде сонымен қатар Невзоровтар отбасы мұражайының 16 графикалық және 8 кескіндеме суреттері қойылған. — Біз ұлы адамдарға арналған іс-шаралар мен көрмелерді жиі өткіземіз. Алайда бүгінгі Абайдың туған күніне арналған көрменің жөні бөлек. Бұл бейнелеу өнері мұражайы болғандықтан, Абай шығармашылығын осы бағытта ұсынуымыз керек. Ал Абай шығармашылығы дегенде Мұхтар Әуезов пен Евгений Сидоркин туралы айтпай кету мүмкін емес. Біз осы көрмені әлдеқайда мазмұнды ету үшін игі дәстүрімізді жалғастырып, шараны қаладағы мәдени мекемелермен бірлесе отырып ұйымдастырдық, – дейді Невзоровтар отбасы музейінің директоры Татьяна Стромская. — Бүгінгі көрмеден біз үш алыптың үндестігін көріп отырмыз. Бірі ақын, бірі жазушы, бірі суретші — үшеуі де қазақ халқы үшін ұлы тұлғалар. Бір ерекшелігі – көрмеде графика да, кескіндеме де, кітап-журналдар да ұсынылған. Көре білген, түсіне білген адам үшін бұл көрменің маңызы жоғары деп ойлаймын. Көрме бір ай бойы жалғасады, Абайды құрмет тұтатын жерлестеріміз міндетті түрде бұл көрмені тамашалауға келеді деген ойдамыз. Әсіресе жасөспірімдерді күтеміз, — дейді ғылыми қызметкер Мұратбекова Арайлым Бейсенқызы.
Ерасыл КЕНЖЕБЕКОВ, «Семей таңы»
