Оқу-ағарту министрлігі, Абай облысының және Абай ауданының білім бөлімінің қолдауымен 14-17 тамыз аралығында өтетін ХХІІІ Республикалық Абай оқуларының ашылу салтанаты Абай алаңында өтті.
Ашылу салтанатына Абай облысы әкімінің орынбасары Шалқар Байбеков, білім басқармасы басшысының міндетін атқарушы Нұржан Ахметқалиев және «Дарын» білім беру орталығының қызметкерлері қатысты. Келген қонақтар Абай мүсініне гүл шоқтарын қойды.
Еліміздің барлық облысынан келген 120 дарынды оқушыларға Ұлы Ақынның өлеңдері мен қара сөздерін жатқа білуі жарыстың басты шарты ретінде қойылған.
XXIII республикалық Абай оқулары үш бөлім бойынша өткізіледі. Бірінші кезең – «Өлең сөздің патшасы, сөз сарасы» — Абай Шәкәрімнің шығармаларын қаншалықты білетінін сынау, екінші – «Көңілім әнді ұғады» — ақындардың әндері мен күйлерін орындау, үшінші – «Жүйріктен жүйрік озар» — жас дарындар байқауымен жалғасып, «Абай әлемі» тақырыбында эссе жазумен аяқталады.
Жарысқа қатысушы оқушылар сайысқа дейін Абай облысының киелі де, қасиетті жерлерін тамашалайтын болады. сайыс соңында жеңімпаздар мен жүлдегерлер қаржылай және материалдық сыйлықтармен марапатталады.
