Күршім ауданындағы қорғаннан ат әбзеліне арналған алтын әшекейлер табылды. Бұл туралы Шығыс Қазақстан облысының әкімі Даниал Ахметов инстаграм әлеуметтік желісіндегі жеке парақшасында жазды.
«Облысымыздың аумағында қазба жұмыстарын жүргізіп жатқан археолог Зейнолла Самашевтың тобы кезекті рет ғылыми жаңалық ашты. Ғалымдар Күршім ауданындағы обаны қазу барысында ат әбзеліне арналған алтын әшекейлерді тапты. Жылқының сақ тайпасынан шыққан патшаға тиесілі болғаны анықталып отыр. Бұлар – ерекше әдемі әшекейлер. Өкінішке қарай, қорғанның өзі тоналған болып шықты, бірақ екі жасырын орны сақталған екен»,- деп жазды ШҚО әкімі Даниал Ахметов.
Қазба жұмыстары кезінде сондай-ақ алғаш рет металл үзеңгі табылған, онда барыспен аң аулау сәті бейнеленген. Аталған жәдігерлер мұражайға қойылған.
Сонымен қатар, ШҚО әкімінің айтуынша, археологтер Елеке сазы алқабындағы қорғандардың бірінен табылған музыкант-жауынгердің кескін-келбетін және ежелгі музыкалық аспаптарды қалпына келтірген.
«Алдағы уақытта ұлттық аспаптардың қас шеберлері өңірімізге шақырылады, олар домбыра «атасының» көшірмесін жасап, үнін шығаруы тиіс»,- дейді ШҚО басшысы.
Қазба жұмыстары әлі де жалғасып жатыр. Ал қыркүйек айында «Алтай – түркі әлемінің алтын бесігі» халықаралық форумы өтпек, өйткені Шығыс Қазақстанның байырғы тарихы мен археологиясы әлемнің озық ғалымдарын таң қалдырып, тәнті етуде.
Ерлан АЙҚЫНҰЛЫ,
«Семей таңы»
