Биыл SP Jet ЖШС «Қазақстанның үздік тауары» байқауының аймақтық кезеңінде бірінші орынға ие болды. ШҚО Кәсіпкерлер палатасының директоры Қайрат Мамырбаев шығарылатын өніммен танысу үшін кәсіпорынға барып, мекеме басшысы Александр Строкатовпен серіктестікті одан әрі дамыту мәселелерін талқылады.
Дана ТАЛҒАТБЕК,
«Семей таңы»
SP Jet кәсіпорны импорт алмастыру және отандық нарықты стандартты емес өнімдермен толықтыру мәселелерімен сәтті айналысуда. 2014 жылдан бастап мұнда SKF Economos австриялық технологиясы арқылы тығыздағыш элементтер өндірісі жүзеге асырылуда. 7 жылдан астам уақыттан бері кәсіпорын гидравликалық және пневматикалық тығыздағыштарды, жүктеме және сырғу элементтерін, перфораторларға арналған төлкелерді және тау-кен жабдықтарының әр түріне арналған өзге де бұйымдарды тұрақты жеткізуде. 2018 жылдан бастап SP Jet барлық типтегі гидравликалық және пневматикалық цилиндрлерді дайындаумен және жөндеумен айналысады. Компания үш өлшемді кеңістікте жұмыс істейтін бірегей CTX 510 Ecoline, DMH500M және SEAL Jet NG060 CNC станоктарын қолдана отырып, өндірілетін өнімдердің тізімін кеңейтуде.
Кәсіпорын басшысы ШҚО Кәсіпкерлер палатасының директорына өндіріс цехтарын және «гидравлика орталығы» бөлімдерін көрсетті. Кәсіпорын қызметкерлері заманауи жабдықтармен жұмыс істеуді меңгерген, оларды оқыту үшін шет елден мамандар шақыртылған. Бүгінде мұнда кез келген күрделі тапсырысты орындай алатын 30 адам — өз ісінің нағыз шеберлері еңбек етеді.
Кездесу барысында кәсіпорын басшысы қазіргі уақытта қызметкерлерді мемлекеттік бағдарлама бойынша 75 млн теңгеге сатылып алынған CTX 510 Ecoline әмбебап станогында жұмыс істеуге үйрету мүмкіндігін қарастырып жатқандарын айтты.
Александр Строкатовтың айтуынша, күрделі бөлшектерді қарапайым станокта жасаса, екі күн кетеді, ал әмбебап станокта әлдеқайда жылдам дайын болады. Машина барлық операцияларды бір уақытта орындайды: қайрайды, тесіктерді бұрғылап, ойықтардың ішін фрезерлейді. Мүмкіндіктер зор. Кәсіпорынға енді бұл құрылғыда жұмыс істеуге үйрететін мамандар шақыру керек.
Өз кезегінде облыстық Кәсіпкерлер палатасының басшысы Қазақстанда пандемияға дейін «Аға сеньорлар» жобасы жүзеге асырылғанын, бұл кәсіпкерлерге өз жұмысшыларын басқа елдердің мамандарын тарту арқылы оқытуға мүмкіндік бергенін айтып өтті.
— Қазіргі уақытта бұл жоба жүзеге асырылмайды, бірақ қызметкерлерді жаңа құрылғыда жұмыс істеуге үйрете алатын мамандарды Ресейден шақыру үшін басқа мүмкіндіктерді іздестіретін боламыз. Мысалы, Еуропа қайта құру және даму банкі ұсынатын мүмкіндіктерді қарастыруға болады, – деп атап өтті Қайрат Мамырбаев.
Кәсіпорын «Қазмырыш» ЖШС, «Алел»ФИК» АҚ, «Қазақмыс» корпорациясымен, Шығыс Қазақстанның тау-кен және тау-кен өндіруші компанияларымен тығыз байланыста жұмыс істейді.
— Біз шығарылатын өнімге СТ KZ сертификаттарын тұрақты түрде рәсімдейміз, өйткені біздің серіктестеріміз бен тұтынушыларымыздың бұл сертификатқа деген сенімі жоғары. Мәселен, Ресейде біздің сертификат сенімге ие. Қазіргі уақытта біз ресейліктермен келісімшарт жасап жатырмыз, өнімдерімізді сонда импорттаймыз. Әрине, бұл ресейлік тарапқа тиімді, өйткені оларға біздің өнімдерімізді өнеркәсіптік сынақтан өткізудің қажеті болмайды, — дейді Александр Строкатов.
Қазір ШҚО-да SP Jet-ке ұқсас кәсіпорындар жоқ, сондықтан тапсырыс көп. Компания шығыста танымал және отандық өндірушілер көрмелеріне тұрақты түрде қатысып тұрады. Биылғы шілде айында кәсіпорын жоғары сапалы өнімдері мен импортты алмастыруды дамытуға қосқан зор үлесі үшін «Қазақстанның үздік тауары» байқауының аймақтық кезеңінде «Өндірістік мақсаттағы үздік тауарлар» номинациясы бойынша жеңіске жетті.
— Жыл соңында өтетін байқаудың республикалық кезеңінде кәсіпорын үздіктердің үздігі атану үшін күресетін болады. SP Jet ЖШС-нің өндірістік мүмкіндіктерін және ішкі нарықта бәсекелестіктің жоқтығын ескере отырып, кәсіпорынның әлеуетін сақтап, одан әрі дамуына серпін беру үшін қолдан келгеннің бәрін жасау қажет, — деп қорытындылады сөзін Қайрат Мамырбаев.
