ШҚО Энергетика және ТҮКШ басқармасының мәліметіне сүйенсек, облысты жылу беру маусымына дайындық жұмыстары бекітілген кес-теге сәйкес жүргізіліп жатыр. Әлеуметтік нысандар мен білім беру мекемелері 100 пайызға, ал денсаулық сақтау нысандары 98 пайызға дайын.
Дана ТАЛҒАТБЕКОВА,
«Семей таңы»
«Қала және аудан әкімдіктері инженерлік инфрақұрылымды жөндеу жұмыстарын жүргізіп жатыр. Бүгінде ірі қазандықтар мен жылу электр станцияларының дайындығы – 61%, шағын қазандықтардың дайындығы – 81%. Сондай-ақ 968 шақырым жылу желілері қысқа дайындалған», — делінген ақпаратта.
Осы ретте көмір мәселесі өте өзекті. Шығыс Қазақстан халқына 354,3 мың тонна көмір жеткізілген. Тұрғындарға күз кезінде дүрбелең тудырмас үшін қазірден бастап қамданып, көмір жеткізіп алу ке-ректігі үнемі ескертіліп келеді.
«Қазір темір жол тұйықтарында 13,7 мың тонна көмір бар. Оның ішінде Өскемен қаласында – 5,5 мың тонна, Риддер қаласында – 4,8 мың тонна, Глубокое ауданында – 600 тонна, Алтай ауданында – 2,6 мың тонна, Шемонаиха ауданында – 210 тонна. Бюджеттік ұйымдар 39,6 мың тонна көмірмен қамтамасыз етілген», — делінген мәліметте.
Осы орайда айта кетсек, өткен аптада ШҚО әкімі Даниал Ахметов Риддер қаласының 2022-2023 жылғы жылу беру маусымына дайындығы жөнінде кезекті кеңес өткізді. Жиында облыс басшысы 1 қыркүйекке қарай қаладағы барлық тұрғын үйлердің дайындық паспорттары болуы керектігін, ал ол құжатты арнайы сертификаты бар мамандар тексеретінін жеткізді. Даниал Ахметов жауапты тұлғалар өткен жылғы қателіктерді қайталамауы керектігін, бұл мәселе қатаң қадағалауда болатынын ескертті.
— Бұл ретте энергетика және ТҮКШ басқармасының мамандары қалаға барып, паспорттардағы деректердің шындыққа сәйкестігін тексеруі тиіс. Өткен жылғы қателіктер қайталанбауы керек,- деді ШҚО әкімі.
Даниал Ахметов сонымен қатар басқармаға мәселе туындамас үшін гидравликалық режимді тексеретін компаниямен байланысуды тапсырды.
— Біз сондай-ақ Риддер ЖЭО басшылығымен кездестік, онда қазір жабдықтар жөнделуде. 1 және 2 турбинаға жөндеу жүргізілді, 5 турбина қыркүйекке қарай аяқталады, 0,7 км жылу трассасына жөндеу жүргізілді, жылыту маусымы басталғанға дейін тағы 2 км трассаға жөндеу жүргізілетін болады,- деді облыс басшысы.
ШҚО әкімі барлық бюджеттік ұйымдарға жылу үшін алдын ала төлем жасауды тапсырды. Бұл қаражат ЖЭО үшін отын сатып алуға және жөндеу жұмыстарына жұмсалады. Күн сайын жылу станциясына 10 вагон көмір келеді. Жылыту маусымында қала тұрғындарына 5300 тонна қатты отын қажет, екі тұйық жұмыс істейді. Бүгінгі дейін халықтың 61 пайызы қатты отын сатып алған, ешқандай дүрлігу байқалмайды. Әкім орынбасары аптасына бір рет Риддерге барып, жылыту маусымына дайындық барысын бақылайтын болады.
