Сәрсенбі күні облыстық әкімдікте Абай облысының Қоғамдық кеңесінің бірінші отырысы өтті. Отырыстың күн тәртібіндегі басты мәселе – Қоғамдық кеңес төрағасын сайлау. Жиынға облыстық мәслихат хатшысы Қуаныш Сүлейменов, облыс әкімінің орынбасары Шалқар Байбеков, қоғамдық кеңес мүшелері және БАҚ өкілдері қатысты. Қоғамдық кеңес қалыптастыру жөніндегі жұмыс тобының ашық дауыс беруі арқылы облыс орталығының дамуы мен өркендеуіне үлес қосқан Семей қаласының бұрынғы әкімі Мейрамхат Айнабеков облыстық Қоғамдық кеңес төрағасы болып сайланды.
Облыс әкімінің орынбасары Шалқар Заманбекұлы алғашқы қоғамдық кеңесте жауапты әрі маңызды кеңес құрамына сайланған кеңес мүшелерін құттықтап, қоғамдық кеңестің мемлекет қабылдайтын шешімдердің жариялы, ашық болуын қамтамасыз ететін консультативтік-кеңесші, әрі бақылаушы орган екенін атап өтті.
Жаңа құрамның кеңес төрағасын таңдаған кезде кеңес құрамы өңір бойынша тұрғындардың сенімі мен халық арасындағы беделіне сүйенді.
— Қоғамдық кеңестің алғашқы отырысында мүшелік еткен адамдардың шешімі бойынша төраға етіп сайландым. Ендігі жұмыс – кеңес құрамымен ақылдасып, жоспар құру. Қоғамдық кеңес президиумын жасақтап, әртүрлі сала бойынша құрам бекітетін боламыз. Ең басты міндет – халық пен билік арасында көпір болу, халықтың әл-ауқатын жақсартуға ат салысу, — дейді Мейрамхат Кәрібекұлы.
