«Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығында Петропавл қаласынан келген «Ордасы ұлы Абылайдың» атты жылжымалы көрмесі өтті.
Іс-шараны «СҚО әкімдігінің мәдениет, тілдерді дамыту және архив ісі басқармасының Абылай хан резиденциясы» КМҚК, «Абайдың «Жидебай-Бөрілі» мемлекеттік тарихи-мәдени және әдеби-мемориалдық музей-қорығы ұйымдастырып отыр.
Аталған көрмеде 30 — дан астам экспонат ұсынылды, олардың ішінде бірегей экспонаттар: XVIII ғасырда жоңғарлардан отанын қорғаған, Есіл ауданының Көктерек ауылының тумасы Қазыбек (тышқан) батырдың найзасының ұшы, Абылай ханның серіктерінің бірі – Құлеке батырдың найзасының элементтері, қазақ жауынгерлерінің қару-жарақтары, құжаттар, суреттер.
Айтып өтетін жайт, көрмеге Маңғыстау облысы, Ақтау қаласынан қонақ ретінде студенттер келді.
Көрменің басты мақсаты — өз мемлекетінің тәуелсіздігі мен оның басқару уақыты үшін күрескен ұлы мемлекеттік қайраткер Абылай хан туралы замандастардың білімін байыту.
Ұйымдастырушылардың айтуы бойынша: Абылайды жан-жақты насихаттап, танытуымыз керек.
— 2018 жылы Петропавл қаласында «Абылай хан резиденциясы» музей кешені ашылған болатын. Біздің резиденциямыз елімізде ұлы ханның өзіне арналған қайталанбас музейлердің бірі. Семей біздің келіп отырған алғашқы қаламыз емес. Республикамыздың әр түрлі аймақтарында болдық. Атап өтсек, Қостанай, Ақмола, облыстары. Алдағы уақытта Павлодар облысына ат басын бұруды жөн көріп отырмыз. Көрмеде көрсетілген жәдігерлердің басым бөлігі құжаттар. Көрмеміз жылжымалы болғкандықтан, көптеген жәдігерлерді өкінішке орай алып келе алмадық. Бірақ, көпшілік білмейтін, құнды ақпарат беретін құжаттар бар. Сондықтан көрменің қызықты болатыны сөзсіз», деді «Абылай хан резиденциясы» музей кешені директорының орынбасары Қыдбекова Әсемгүл Ерғалиқызы.
