ШҚО-да денсаулық сақтау саласы мамандары жетіспейді. Бұл туралы ШҚО әкімі Даниал Ахметов кеңейтілген аппараттық кеңесте айтты.
ШҚО әкімі Даниал Ахметовтің төрағалығымен өткен жиында осы және басқа да бірқатар маңызды мәселелер талқыланды.
— Бүгінгі таңда денсаулық сақтау саласындағы кадрларға қажеттілік — 243 адам, дәрігерлер Өскеменде, сондай-ақ Риддерде және кейбір ауылдарда жетіспейді,- деді әкім.
Даниал Ахметов қалалар мен аудандар әкімдеріне медицина мамандарын ынталандыру жолдарын қарастыруды тапсырды.
— Дәрігерлер үшін тұрғын үй салу және ауылдарда ғана емес, қалаларда да көтермеақы бөлу мәселесін қарастыру қажет,- деді ШҚО басшысы.
Даниал Ахметов жақында 13 дәрігер жаңа гематологиялық орталықта әрі қарай жұмыс істеу үшін оқуға баратынын айтты. Сондай-ақ өз ауруханаларының базасында наркозбен кейбір зерттеулер жүргізу үшін аудандық мамандардың біліктілігін арттыру қажет.
Кеңейтілген аппараттық кеңесте қаралған тағы бір маңызды мәселе — қысқы маусымға дайындық. Жиында белгілі болғандай, бүгінгі күні әлеуметтік және білім беру нысандары 100%, медициналық мекемелер 99% дайын. Халықтың 69 пайызы өз қажеттіліктері үшін көмір алып үлгерген.
— Өскемен қаласына жақын аудандарда бірінші қыркүйекке дейін бұл көрсеткіш 100%-ға жетуі тиіс. Оның үстіне қаладағы тұйықтарда 5 мың тонна қатты отын бар. Энергетика және ТҮКШ басқармасы гидравликалық режимді тексеріп, тұрғын үй қорының жылыту маусымына дайындығын бақылауда ұстауы тиіс,- деп атап өтті ШҚО әкімі.
Даниал Ахметов барлық үйлерде дайындық паспорттары болуы керектігін тағы бір мәрте ескертті.
ШҚО басшысының айтуынша, биыл 20 әлеуметтік және мәдени нысанның құрылысы жүріп жатыр, тәуелсіздік жылдары алғаш рет Риддерде жаңа мектеп пайдалануға берілген. Артта қалған спорт нысандарын барынша азайтуға мүмкіндік туды, негізінен, жұмыстар кесте бойынша жүргізілуде.
Даниал Ахметов қалалар мен аудандардың әкімдеріне барлық білім беру мекемелерінің жаңа оқу жылына дайындығын тексеруді, сондай-ақ көп балалы отбасыларды мектеп формасымен, аяқ киіммен және қажетті кеңсе тауарларымен қамтамасыз ету процесін бақылауға алуды міндеттеді. Ал облысқа оқулықтардың жеткізілуі ерекше бақылауда тұр.
Ерлан АЙҚЫНҰЛЫ,
«Семей таңы»