Шығыс Қазақстан облысындағы тұрғын үй құрылысының жылдық өсімі — 126 пайыз. Бұл туралы облыс әкімдігінде өткен жиында жауапты басқарма басшысы мәлімдеді.
Шығыс Қазақстандағы тұрғын үй құрылысы мәселесі қаралған отырыста облыстық Құрылыс, сәулет және қала құрылысы басқармасының басшысы Дидар Кеңесбаев есеп берді.
— Тамыз айында 16,7 мың шаршы метр тұрғын үйді пайдалануға беруді жоспарлап отырмыз. Бұл өткен жылмен салыстырғанда 107,8 пайызды құрайды. 2022 жылдың қорытындысында 126,1 пайыз көрсеткішті көздеп отырмыз. Ол 347,7 мың шаршы метр тұрғын үйді құрайды,- деді облыстық Құрылыс, сәулет және қала құрылысы басқармасының басшысы Дидар Кеңесбаев.
Бүгінде Шығыс Қазақстанда құрылыс қарқынды жүріп жатқанымен, баспана кезегінде тұрғандар әлі де көп.
ШҚО әкімі Даниал Ахметов халықтың жеке тұрғын үй құрылысына қызығушылығы зор екенін атап өтіп, қазіргі күні барлық қажетті инфрақұрылымы бар учаскелерді талдауға және коммуникация желілерін жүргізу үшін жеке құрылыс салуға перспективалы аудандар үшін бюджет шығындарын есептеуге тапсырма берді.
Бүгінгі күні ауылдық жерлерде тұрғын үйге мұқтаж 156 көп балалы және аз қамтылған отбасы тұрады. Халықтың осы санаты үшін төрт түрлі үй жобасын әзірлеп, бұл жобаларды іске асыруға дайын құрылыс компанияларымен келіссөздер жүргізу қажет.
— 30 тамызға қарай 2023 жылы коммерциялық, жалға берілетін, бюджеттік және жеке баспаналар, сондай-ақ «Бір қабатты Шығыс» бағдарламасы бойынша салынатын үйлерді нақтылаймыз,- деді ШҚО әкімі.
— Мен 30 тамыз күні 156 үйдің құрылыс бағдарламасымен танысатын боламын. Бұл баспаналар аз қамтылған, көп балалы отбасыларға арналған. Осылайша, айдың аяғында барлығын нақтылап алуымыз қажет,- деді Даниал Ахметов.
Келесі жылы да бірқатар жоба жоспарланған. Бастысы, уақтылы пайдалануға берілуі қажет.
Бибі ТӨЛЕГЕНҚЫЗЫ,
«Семей таңы»
