Абай облысы әкімінің орынбасары Нұрбол Нұрсағатов жұмыс сапарымен Көкпекті мен Аягөз ауданыдарын барып, жылу беру маусымына дайындық шараларын және республикалық маңызы бар автожолдарды жөндеу жұмыстарының барысын тексерді.
Қазіргі кезде Абай облысында «Қуатты өңірлер – ел дамуының драйвері» ұлттық жобасы шеңберінде Талдықорған – Қалбатау — Өскемен және Қалбатау — Майқапшағай республикалық маңызы бар автомобиль жолдарын жаңғырту жұмыстары жүргізіліп жатыр. Облыс әкімінің орынбасары «ҚазАвтоЖол» ҰК» АҚ бас директоры Мейірхат Қасымбаевпен бірге аталған учаскелерге барды. Көліктік байланысты қамтамасыз ету және елдің көліктік-транзиттік әлеуетін жоғарылату есебінен азаматтардың қолайлы өмір сүру ортасын құру – аталған ұлттық жобаны іске асырудағы мақсаттардың бірі. «Талдықорған – Қалбатау — Өскемен автожолының көп бөлігі біздің облыс арқылы өтеді, оның ұзындығы 394 шақырымды құрайды, осы учаскені жөндеу үшін 288 бірлік техника мен 420 жол жұмысшысы жұмылдырылған. Қалбатау – Майқапшағай » автожолының ұзындығы 197 шақырымды құрайды, 279 бірлік техника және жеке құрамнан 348 адам тартылған», — дейді Нұрбол Төлегенұлы. «ҚазАвтоЖолдың» ақпараты бойынша, жөндеу жұмыстарын 2023 жылғы желтоқсан айында аяқтау жоспарланған.
Ерлан АЙҚЫНҰЛЫ,
«Семей таңы»
