Шығыс Қазақстан облысы әкімдігінде аймақ басшысы Даниал Ахметовтің төрағалығымен кезекті кеңес өтті. Жиында Тарбағатай ауданында негізгі жобаларды жүзеге асыру мәселесі қаралды. ШҚО әкімінің айтуынша, әлеуметтік сала, көлік және инженерлік инфрақұрылыммен қамтамасыз ету, интернетке қол жеткізуге байланысты жобалар басымдыққа ие. Ауданға жасаған жұмыс сапары барысында облыс басшысы бірінші кезектегі міндеттерді айқындауды тапсырған болатын. Құрамына барлық басқармалардың өкілдері кіретін комиссия бәрін де егжей-тегжейлі талдайтын болады. Бүгінгі күні Тарбағатай ауданындағы басты мәселелердің бірі – ауылдарды таза ауыз сумен қамту. Қазіргі күні шалғайдағы ауылдардың тұрғындары суды құдықтан алып ішуге мәжбүр. — Әрине, сумен жабдықтау бойынша бірқатар жобалар, сондай-ақ қажет болған жерде блоктымодульді станциялар желілерін төсеу және жөндеу іске асырылатын болады, — деді Даниал Ахметов. Сонымен қатар көп балалы, тұрмысы төмен отбасылар, әлеуметтік осал топтарға жататын азаматтар үшін арнайы жоба қарастырылмақ. ШҚО әкімі көп балалы отбасыларға ғана емес, жас мамандарды тарту үшін оларға да жағдай жасау қажеттігін атап өтті. Басқа ауыл-аймақтардағыдай Тарбағатай ауданында да кадр тапшылығы байқалады. 40 мыңға жуық тұрғыны бар үлкен ауданда денсаулық сақтау, білім беру салаларында мамандар жетіспейді. — Көп балалы және аз қамтылған отбасыларға арналған 156 үйдің 48-ін Тарбағатай ауданының 9 ауылында саламыз. Бұл ретте жас мамандар – дәрігерлер мен мұғалімдер, ветеринарларға да тұрғын үй қарастыру маңызды, — деді ШҚО басшысы. Жиында Шеңгелді ауылындағы мектеп құрылысы да сөз болды. — Шеңгелдідегі мектептің құрылысына келетін болсақ, мұнда 18 қыркүйекке дейін қолайлы типтік жобаны таңдап, келісімшарт аясында құрылысты бастау керек, — деді Даниал Кенжетайұлы. Сонымен қатар ауданда тұрғындардың интернетке қолжетімділігін қамтамасыз ету үшін антенна-діңгек құрылыстарын орнату жұмыстары басталды. Бұл мәселе бейінді министрлікпен де пысықталуда. Жалпы, қазіргі күні көптеген негізгі жобаларға жобалық-сметалық құжаттар дайын.
Бибі ТӨЛЕГЕНҚЫЗЫ,
«Семей таңы»
