Өскемен қаласының әкімі Жақсылық Омар шаһардағы инфрақұрылымдық жобалар аясында жүргізіліп жатқан жұмыстардың барысымен танысып қайтты.
Қала басшысы алдымен «Рауан-Восход» бау-бақша серіктестігінде болды. Мұнда электрмен жабдықтау жүйесін орнату жұмыстары басталды.
— Бұл — бау-бақша серіктестігінің алғашқы пилоттық желілік жобасы, өйткені бұған дейінгі жеке трансформатор арқылы қосылу схемасы тұрғындардың шағымдарын тудырды. Егер тәжірибе сәтті болып, оң бағаланса, біз жобаны кеңейтетін боламыз, — дейді Өскемен қаласының әкімі Жақсылық Омар.
Ал Шығыс Қазақстан облысы әкімі Даниал Ахметов жоба іске қосылмай тұрып, электр жүйесімен жабдықтау керектігін айтқан болатын.
— Мұнда 200-ден астам учаске бар, 151 үйде 500-ге жуық адам тұрақты тұрады. Негізі саяжай массиві қаланың шағын ауданына айналып үлгерді. Тұрғындар тұрақты тұру үшін коттедждерді сатып алуды жалғастыруда. Мұнда қуат жеткіліксіз болды. Қазір жоба әзірленді. Бюджеттен 90 миллион теңгеге жуық қаржы бөлініп, саяжай аумағын энергиямен қамтамасыз ететін серіктестік жұмысты шілде айының соңына дейін аяқтауға уәде берді”- деген еді ШҚО басшысы.
Одан кейін қала басшысы Қазақстан көшесіндегі рельс жолдарын қайта жаңартуды жалғастыруға дайындық жұмыстары жүріп жатқан трамвай паркіне барды. Қалада жаңа рельстер қойылып, қазір парк базасында монтаждауға дайындық жүргізілуде.
Бұл күні қала әкімі Соградағы Фасадная көшесіне де барды. Аталған көшенің бойында орналасқан алаңды абаттандыру жұмыстары аяқталуға жақын. Жарықтандыру жүйесі қазірдің өзінде дайын, алаң жолдарына асфальт пен кеспе тас төселген.
Жақсылық Омардың айтуынша, келесі кезекте балалар алаңы, орындықтар мен қоқыс жәшіктері орнатылады.
Ерлан АЙҚЫНҰЛЫ,
«Семей таңы»
