Самар ауданының әкімі Раджан Сейтқанов аудан тұрғындарын жеке мәселелері бойынша қабылдады. Қабылдауға Аққала, Палатцы, Самар, Раздольное ауылдарының тұрғындары келді. Азаматтардың көтерген мәселелері әр алуан.
Статистикалық деректерге сүйенсек, бүгінгі таңда Қазақстан халқының шамамен 40 пайызы ауылдық жерлерде тұрады. Ал ауылдарда әр салада шешілмеген мәселе көп. Мысалы, еліміздегі әрбір үшінші елді мекенде дәріхана жоқ. Аққала ауылының тұрғыны әкіммен кездесуде осы мәселені көтеріп, дәріхана ашу туралы ұсыныс айтты. Оның айтуынша, мыңға жуық халқы бар округте бірде-бір дәрі-дәрмек сататын орын жоқ. Ауыл тұрғындары науқастана қалса аудан орталығына баруға мәжбүр. Ал Палатцы ауылынан келген тұрғындар жер мәселесін қозғады.
Бұл күні қабылдауда болған Самар ауылының тұрғындары тұрғын үй мәселесін де көтерді. Аудан орталығы мәртебесіне қайта ие болған Самар ауылында баспана — басты мәселе. Тұрғындар жергілікті халықты тұрғын үймен қамту мәселесін ерекше назарда ұстауды өтінді.
Жаңадан құрылған ауданда жұмыссыздық проблемасы да жоқ емес. Самар ауданы Көкпекті ауданының құрамына қосылған кезде өңірде жұмыс орындары жабылып, адамдар нәпақасыз қалған еді. Сол кезден бастап белең алған жұмыссыздық мәселесі шешімін таппай келеді. Екі қолға бір күрек таппай жүрген ауылдықтардың тілегі – жаңа жұмыс орындарының ашылуы.
Тұрғындардың өтiнiш-тілектерiн мұқият тыңдаған өңір басшысы көтерілген мәселелердiң оңтайлы шешiмiн табу үшiн тиiстi жұмыстар жүргізілетінін жеткізді.
Аудан әкімі Раджан Сейтқановтың айтуынша, жеке қабылдаудың қорытындысы бойынша азаматтар тарапынан түскен ұсыныс, өтініштерді зерттеп, шешу жолдарын іздестіру, іс-шаралар жоспарына енгізуді қарастыру тиісті сала басшыларына міндеттелді.
Талшын ҚАЛИАСҚАР,
«Семей таңы»
