Шемонаиха ауданындағы Первомай кентінде «Белсенді ұзақ өмір сүру 60+» атты спорт сайысы өтті. Әлеуметтік жоба аясында ұйымдастырылған шараға Зевакино ауылының және Первомай кентінің медициналық-әлеуметтік мекемесінің қызметкерлері, сондай-ақ қарттар мен мүгедектерге арналған жалпы үлгідегі интернат үйлерінде тұратын азаматтар қатысты.
Қатысушы командалар веложарыста бақ сынады. Сайысты Первомай кентінің медициналық-әлеуметтік мекемесі басшысының міндетін атқарушы А.Горбачев құттықтау сөзбен ашты. AMANAT партиясы аудандық филиалының атқарушы хатшысы Е.Шабанова да жылы лебізін білдіріп, жарысқа қатысушыларға сәттілік тіледі.
Медициналық-әлеуметтік мекеме ұжымы ұсынған концерт шараға жиналғандардың көңілін көтеріп, сайыс көрігін қыздыра түсті.
— Спорт сайысын ұйымдастырудағы басты мақсатымыз – қатысушылардың спорттық дайындығын көрсету ғана емес, сонымен қатар әлеуметтік қызмет көрсету мекемелерінде тұратын жандардың бір-бірімен қарым-қатынас жасауына, мекемелер қызметкерлері мен басшыларының жұмыс тәжірибесімен алмасуына мүмкіндік тудыру, — дейді аудандық ардагерлер кеңесінің төрайымы С.Лычагина.
Жарыс қорытындысы бойынша, жалпыкомандалық есепте бірінші орынды Зевакино ауылы медициналық-әлеуметтік мекемесінің «Ержүрек» командасы, екінші орынды Первомай медициналық-әлеуметтік мекемесінің «Оптимистер» командасы иеленді. Барлық қатысушылар бағалы сыйлықтарға ие болды. Сонымен қатар сайыскерлерді қолдап-қолпаштап, демеп отырған жанкүйерлерге де тәтті-дәмділер таратылды.
Қатысушылар сайыстың жоғары деңгейде өткенін айтып, жақсы көңіл-күймен тарқасты.
Айта кету керек, Шемонаиха ауданының мединалық-әлеуметтік мекемесінде қарт адамдарды дене шынықтырумен айналысуға тарту үшін барлық жағдайлар жасалып отыр. Дене шынықтыру және сауықтыру топтары үйде және таза ауада спортпен шұғылдана алады, егде жастағы азаматтар үшін ауылдық және аудандық спорт фестивальдары мен мерекелер ұйымдастырылады, әлеуметтік қызмет көрсету мекемелерінде тұратын жандар теннис сабақтарына қатысады, скандинавиялық жүріспен те айналысады.
Арайлым ҚАЖИАҚПАРОВА,
«Семей таңы»
